अमेरिकी सरकारबाट पत्र आयोः

५ डिसेम्बर, ०७ । नेकपा माओवादीका विदेश विभाग प्रमुख सीपी गजुरेलले अमेरिकासंग आधिकारिक पत्राचार शुरु भएको खुलासा गर्नुभयो । आफूहरुको अन्तर्राष्ट्रिय सम्बन्ध निकै सुध्रिएको बताउदै भन्नुभयो,'अमेरिकी सरकारका तर्फबाट आफूहरुलाई पहिलोपटक पत्र आएको छ ।' अमेरिकाले आफूहरुलाई हेर्ने दृष्टिकोणमा निकै परिवर्तन आएको भन्दै अनौपचारिक रुपमा कुराकानी भइरहेको बताउनुभयो । विदेशीहरुले नेपालको शान्ति प्रक्रिया सफल हुनुपर्छ, सात दलीय एकता कायमै रहनुपर्छ भनेको बताउनुभयो । शान्ति प्रक्रियामा मित्रराष्ट्रहरुबाट चासो बढ्नुलाई अस्वाभाविक रुपमा नलिएको बताउनुभयो । भारतका पूर्व विदेशसचिव श्यामशरणले केही समय अगाडि संसदबाट गणतन्त्र घोषणा गर्नु वैधानिक हुदैन भनी बोलेको उल्लेख गर्दै भन्नुभयो,'भारतीय पक्षको हस्तक्षेपकारी नीति सह्य हुदैन ।' प्रधानमन्त्री परिवर्तनको विषय प्राथमिक नभएको बताउनुभयो । संसदबाट बहुमतले पारित गणतन्त्र घोषणा र पूर्ण समानुपातिक निर्वाचन प्रणालीको प्रस्ताव कार्यान्वयन नगरे प्रधानमन्त्रीको विकल्प खोज्ने बताउनुभयो । उहांले भन्नुभयो,'सरकारको नेतृत्व परिवर्तन हाम्रो एजेण्डा हैन ।' चुनाव चैत्रमा नभए फरक नपर्ने उहांको भनाई थियो । सात दलीय एकता र शान्ति प्रक्रियाको निरन्तरता प्राथमिक हुनुपर्नेमा जोड दिनुभयो । आफूहरु राजाका वरपरका राष्ट्रवादीलाई समेट्नुपर्ने पक्षमा रहेको बताउनुभयो । राजसंस्थाको दाहसंस्कारपछि राष्ट्रवादीहरु पलायन नहुन् भन्ने मान्यतामा रहेर अध्यक्ष प्रचण्डले पछिल्लो अभिव्यक्ति दिनुभएको उहांको भनाई थियो । 'राजा नरहेपछि राष्ट्रवादी कहां जाने -' उहांले प्रश्न गर्नुभयो,'हामी राष्ट्रवादीसंग मोर्चाबन्दी गर्नुपर्छ भन्ने मान्यता राख्छौं ।' नेपाली कांग्रेसका केन्द्रीय सदस्य डा. शेखर कोईरालाले संसदबाट गणतन्त्र घोषणा गरे संविधानसभा निर्वाचन हुननसक्ने बताउनुभएको छ । रिपोर्टर्स क्लब नेपालको साक्षात्कार कार्यक्रममा बोल्नुहुदै उहांले जनताको मतबाटै गणतन्त्रलाई अनुमोदन गरी कार्यान्वयन गरे वैधानिक हुने बताउनुभयो । 'संसदबाट गणतन्त्र घोषणा गर्दा संविधानसभा हुनसक्ने सम्भावना रहदैन,' कोईरालाले भन्नुभयो,'कांग्रेस संविधानसभापछि लागू हुनेगरी गणततन्त्र घोषणा गर्ने पक्षमा भने तयार छ ।' लोकतन्त्रमा विधिको शासन अनिवार्य भएको बताउदै उहांले गणतन्त्र घोषणा पनि विधिसम्मत तरिकाले गर्नुपर्नेमा जोड दिनुभयो । कांग्रेस पूर्ण समानुपातिक निर्वाचन प्रणालीका पक्षमा कुनै हालतमा नजाने स्पष्ट पार्नुभयो । पूर्ण समानुपातिकमा जांदा व्यक्तिगत स्वतन्त्रता नरहने, जातीय आधारमा निर्वाचन प्रणाली बनाउंदा मुलुक टुक्रनसक्ने उल्लेख गर्नुभयो । कांग्रेसले सरकारको नेतृत्व छाड्ने तर पूर्ण समानुपातिक निर्वाचन प्रणालीमा नजाने स्पष्ट पार्नुभयो । रिपोर्टर्स क्लब नेपालको साक्षात्कार कार्यक्रममा बोल्दै कोइरालाले संविधानसभालाई केन्द्रबिन्दु बनाई सहमती निर्माण गर्नुपर्ने बताउनुभयो । चैत्रसम्म संविधानसभा निर्वाचन नभए कहिले हुननसक्ने अवस्था सृजना हुने खतरा औल्याउनुभयो । विगतमा भएका सहमतीको कार्यान्वयन गर्नुपर्ने र आवश्यक सहमती बनाउदै शान्ति प्रक्रियालाई सफल बनाउनुपर्ने उहांको भनाई थियो । माओवादीका कारण मुलुक अनिर्णयको बिन्दु बनेको उहांको आरोप थियो । प्रधानमन्त्री गिरिजाप्रसाद कोइरालाको विकल्प खोज्ने चर्चाबारे प्रश्न गर्दा उहांले भन्नुभयो,'प्रधानमन्त्रीज्यूलाई विधिसम्मत रुपमा हटाउन चुनौती दिन्छु ।' सडकबाट कसैले बोल्दैमा राजीनामा दिन नहुने बताउदै संसदबाट दुइ तिहाई मत पुर्‍याएर हटाउन चुनौती दिनुभयो । प्रधानमन्त्री गिरिजाप्रसाद कोइरालाले राजीनामा नदिने र हटाउन पनि कसैले नसक्ने उहांको ठोकुवा थियो । प्रचण्डले राजावरपरका राष्ट्रवादीलाई समेट्नुपर्छ भन्नुलाई गम्भीर भन्नुभयो । प्रचण्डको भनाईबाट आफू आश्चर्यचकित भने नभएको उहांको भनाई थियो । मुलुकमा विदेशी चलखेल भने बढेको बताउनुभयो