बन्दको आँशिक प्रभावसगै पड्कियो बम विरगञ्जमा

तराई मुक्ति टाइगर्सले आव्हान गरेको मधेश बन्दको दोस्रो दिन बुधबार आंशिक प्रभाव परेको छ भने टाइगरका कार्यकर्ताहरुले वीरगञ्जमा बम विष्फोट गराएका छन् । बन्दको अवज्ञा गर्दै त्यहाँस्थित बजार पसल, शिक्षण संस्था, कलकारखाना खुलेका छन् ।
वीरगञ्जबाट पूर्व जाने यात्रु बाहक तथा मालबाहक सवारी साधन नचले पनि काठमाडौ आउने र पश्चिम नेपाल जाने सवारी साधन चलेका छन् ।
यसैबीच टाइगर्सका कार्यकर्ताले त्यहाँस्थित नशनल ट्रेडिङ्ग लिमिटेडको कार्यालय नजिकै बम विष्फोट गराएका छन् । बिहान ६.३० बजेतिर गराइएको सो बम विष्फोटनमा मानवीय एवं भौतिक क्षति भने नभएको प्रहरीले जनाएको छ।
मधेशमा स्पेशल टास्कफोर्स परिचालन गरिएको र आफ्ना कार्यकर्ताहरुलाई नियन्त्रणमा लिइएको विरोधमा टाइगर्सले बन्द आव्हान गरेको जनाएको छ।
त्यस्तै मधेशी जनअधिकार फोरम तथा सद्भावना महतो पक्षले आव्हान गरेको रौतहट बन्दको कार्यक्रम १८ दिनपछि केही दिनका लागि फिर्ता लिएको छ । मुस्लिमहरुको महान चाड वक्र इदका लागि बन्दको कार्यक्रम फिर्ता लिएको फोरमका रौतहट अध्यक्ष गणेश यादवले जानकारी दिएका छन् । मुस्लिम धर्मावलम्बीहरु शुक्रबार र शनिबार र आइतबार वक्र इद मनाउँदैछन् ।
१८ दिनसम्म बजार बन्द हुँदा स्थानीयबासीले सास्ती खेपेका थिए । माओवादीले एक वर्षअघि भएको घटनामा आफ्ना कार्यकर्ता मारिएकोमा सो घटनामा संलग्न भएको किटानी जाहेर दिएपछि फोरमले सो बन्द आव्हान गरेको हो ।