राष्ट्रसंघीय उपमहासचिव नेपालमा

संयुक्त राष्ट्रसंघकी सहायक महासचिव जेन हल ल्युट तीन दिनको भ्रमणका लागि सोमबार साँझ काठमाडौ आइपुग्नुभएको छ ।
उहाँ विश्वभरका राष्ट्रसंघीय स्थलगत शान्ति अभियानहरूको स्थापना, निर्देशन र निरन्तरताका लागि जनशक्ति, अर्थ व्यवस्था र बन्दोबस्तीका लागि जिम्मेवार राष्ट्रसंघीय स्थलगत सहयोग कार्यालय (यूएन् डिपार्टमेन्ट अफ फिल्ड सपोर्ट) की प्रमुख अधिकृत हुनुहुन्छ ।
हालका दिनहरूमा शान्ति स्थापनामा भएको प्रगति तथा सैनिक सहयोग प्रदान गर्ने मुलुकका नाताले नेपाल सरकारका अधिकारीहरूसित छलफल गर्ने र अन्मिनका कर्मचारीहरूलाई भेटेर मिसनको स्थलगत व्यवस्थासम्बन्धी विषयमा प्रत्यक्ष जानकारी हासिल गर्ने उदेश्यले ल्युट नेपाल आउनुभएको अनमिनले जनाएको छ ।
नेपाल हाल राष्ट्रसंघीय शान्ति अभियानका लागि सेना पठाउने चौथो ठूलो राष्ट्र भएको छ । यस भ्रमणले ल्युटलाई राष्ट्रसंघीय शान्ति स्थापना कार्यमा सहयोगको निरन्तरताका लागि नेपाल सरकार र नेपाली सेना, नेपाल प्रहरी र सशस्त्र प्रहरीसित प्रत्यक्ष छलफल गर्ने अवसर पनि प्रदान गरेको छ ।
आफ्नो तीन दिने भ्रमणका क्रममा ल्युटले परराष्ट्र मन्त्रालयका सचिव, रक्षा सचिव, नेपाली सेनाका प्रधान सेनापति लगायत नेपाल प्रहरी र सशस्त्र प्रहरीका महानिरीक्षकहरूसित पनि भेट गर्नुहुनेछ । उहााले चितवनस्थित माओवादी सैनिक शिविर तथा नेपालगञ्जस्थित अन्मिनको क्षेत्रीय कार्यालयको पनि भ्रमण गर्नुहुनेछ । उहाँले नेपालको शान्ति प्रक्रियामा राष्ट्रसंघीय सहयोगका बारेमा अन्मिन तथा राष्ट्रसंघीय निकायहरूका वरिष्ठ कर्मचारीहरूसित छलफल पनि गर्नुहुनेछ ।