सातदलीय सहमतिको अन्तिम मस्यौदा तयार

हप्तौंसम्मका छलफलपछि सातदलले संबिधानसभाको चुनाव चैत्र महिनामा गर्ने लगायतका २० सूत्रीय सहमतिलाई अन्तिम रुप दिएका छन्।
तर सहमतिका केही विषयहरुमा भने नेपाली कांग्रेसका सभापति गिरिजाप्रसाद कोइराला र माओवादी अध्यक्ष प्रचण्डबीचको वार्तापछि मात्र टुङ्गो लाग्ने बताइएको छ।
त्यसपछि सो दस्तावेजमा बुधबार सातदलीय नेताहरुले हस्ताक्षर गर्दै सहमति कार्यान्वयनको लागि बाटो खोल्ने अपेक्षा गरिएको छ।
सातदलीय कार्यदलका एकजना सदस्य जनमोर्चा नेपालका नेता लिलामणी पोखरेलका अनुसार निर्वाचन प्रणालीलगायतका विषयहरुमा सहमति बनिसकेको छ।
सरकारको स्वरुप
तर सरकारको स्वरुप लगायत केही विषयहरुमा प्रधानमन्त्री कोइराला र माओवादी अध्यक्ष प्रचण्डले नै छलफल गर्न आवश्यक भएको पोखरेलले बताए।
पछिल्ला दिनहरुमा माओवादीहरुले सरकारमा उपप्रधानमन्त्रीको पद पाउनु पर्ने माग गर्दै आएका छन्।
त्यसैले सरकारको नयाँ स्वरुपबारे बुधबार थप छलफल हुने अपेक्षा गरिएको छ।
पोखरेलका अनुसार संविधानसभाका ६०१ सदस्यहरुको चयन प्रक्रियालाई पनि सरल बनाइने सहमति भएको छ।
तिनमा २४० जना बहुमतीय चुनाव प्रणालीबाट, ३३५ जना समानुपातिक प्रतिनिधित्वको आधारमा र २६ जनाको मन्त्री परिषदले मनोनयन गर्ने व्यवस्था राखिएको बुझिएको छ।
त्यसअघि संविधानसभामा ४९७ जना प्रतिनिधिहरु रहने व्यवस्था गरिएको थियो।
पोखरेलका अनुसार गणतन्त्र घोषणाको विषयमा पनि दलहरुबीच अब कुनै मतभेद छैन।
विगतका संम्झौताहरुको परिपालना, बेपत्ता रहेका नागरिकहरुको छानविन लगायत शहीद परिवारलाई राहत प्रदान गर्ने विषयहरुमा पनि सहमति बनेको उनले बताए।