सीमा अतिक्रमणप्रति दलहरू गम्भीर नभएको गुनासो

काठमाडौँ, मङ्सिर २७ गते । सीमा अतिक्रमणको विषयमा राजनीतिक दलहरू गम्भीर नभएको सीमाविद्हरूको गुनासो छ । नवलपरासीको सुस्ता क्षेत्रमा १४ हजार हेक्टर नेपाली भूमि अतिक्रमण हुँदा पनि दल र तिनको नेतृत्वले भारतीय समकक्षीसँग सशक्त ढङ्गबाट आवाज उठाउन नसकेको उहाँहरूको आरोप छ । सुस्ता अतिक्रमण मात्र होइन, सम्पूर्ण नेपाली भूमिमाथि भारतीय पक्षबाट भएका अतिक्रमणका विषयमा राजनीतिक नेतृत्व र नेपाल सरकारले तत्काल भारतीय समकक्षीसँग वार्ता प्रारम्भ गरेर नेपालआमाको अस्तित्व रक्षा गर्नुपर्छ, सीमाविद्हरूको सुझाव छ । मिडिया मिसन नेपालद्वारा बिहीबार आयोजित 'सुस्तालगायतका सीमा अतिक्रमण' विषयक अन्तरक्रिया कार्यक्रममा विज्ञहरूले सीमा अतिक्रमणका विषयमा सशक्त आवाज उठाउन सुझाव दिनुभएको हो ।कार्यक्रमलाई सम्बोधन गर्दै माओवादीका नेता एवं विदेश विभाग प्रमुख सीपी गजुरेलले नेपालको राष्ट्रियता यतिबेला गम्भीर सङ्कटमा परेकाले राष्ट्र बचाउन सबैले सशक्त आन्दोलन निर्माण गर्नुपर्ने बताउनुभयो ।"नेपाल स्वतन्त्र छ भनेर हामी वकालत गर्ने गर्र्छौं तर जुन किसिमबाट विदेशी अतिक्रमण र हस्तक्षेप भइरहेको छ, त्यसले हामी अझै अर्धऔपनिवेसिक राज्यमा नै छौँ भन्ने पुष्टि गर्छ", नेता गजुरेलले भन्नुभयो, "राष्ट्रलाई स्वतन्त्र नगराउञ्जेल हामीले सङ्र्घष्ा गर्नैपर्छ ।" अब नेपाली जनताले नेपाल राष्ट्रलाई बचाउन धेरै गम्भीर बन्नुपर्ने अवस्था आएको नेता गजुरेलले बताउनुभयो । उहाँले नेपाल र भारतबीचको सीमासम्बन्धी समस्या फौजी तरिकाबाट समाधान गर्न सकिँदैन भन्दै यसको समाधान राजनीतिक तरिकाबाटै खोजिनुपर्ने बताउनुभयो ।"नेपाली जनताको चेतना जागृत नभई हामीले हाम्रो देशको सीमा सुरक्षा गर्न सक्दैनौँ", नेता गजुरेलले भन्नुभयो, "गौर काण्डका बेला अलिकति पनि सबैले चिन्ता व्यक्त गरिदिएको भए अहिले स्थिति यति गम्भीर बन्ने थिएन ।" "गौर काण्डमा माओवादी त मारिए के भयो र भन्दै बसियो, आज भारतीयबाट के भइरहेको छ सबैलाई थाहै छ", उहाँले "गाडीका गाडी भारतीय आएर माओवादी कार्यकर्तामाथि त्यसबेला आक्रमण गरिएको" स्मरण गराउनुभयो ।नेपाली काङ्ग्रेसका नेता एवं पूर्व गृहराज्यमन्त्री देवेन्द्रराज कँडेलले राष्ट्रियताको सवालमा दलगत स्वार्थभन्दा माथि उठेर आवाज उठाउनुपर्नेमा त्यसो हुन नसकेको बताउनुभयो । "सुस्ता मिचिएको मिचियै छ तर सात दल राजनीतिक स्वार्थभन्दा बोल्न सकिरहेका छैनन्", नेता कँडेलले भन्नुभयो, "सीमा अतिक्रमणविरुद्ध राजनीतिक दलको एउटै स्वर हुन नसक्नु पनि ठूलो विडम्बना हो ।" उहाँले सीमा अतिक्रमणका विषयमा वर्तमान सरकारको गम्भीर ध्यानाकर्षा गराउँदा पनि सरकार सचेत नभएको बताउनुभयो । "पद र कुर्सर्ीीे चिन्ताले हामीले राष्ट्रियता गुमाइरहेका छौँ । यो हुनु कसैका लागि पनि राम्रो होइन ।" सीमाविद् फणिन्द्र नेपालले सुस्ताको अतिक्रमणका बारेमा राष्ट्रले आवाज उठाउन ढिलाइ गरे गम्भीर भूल हुने चेतावनी दिनुभयो । भारतीय पक्षबाट ८५ देखि ९० ठाउँमा सीमा अतिक्रमण भएको जानकारी दिँदै सीमाविद् नेपालले भन्नुभयो, "नेपालको र्सार्वभौमसत्तामाथि यसरी खुलेआम प्रहार हुँदा पनि सत्तासीनहरू बोलिरहेका छैनन् ।" उहाँले "नेपाली सेना परिचालन गरेरै भए पनि आफ्नो भू-भागको रक्षा गर्नुपर्छ, यो अहिलेको आवश्यकता पनि हो" भन्नुभयो ।सीमाविद् नेपालले सत्तामा पुग्न अनि सत्तामा टिक्न भारत चाहिन्छ भन्ने नेपाली राजनीतिज्ञहरूको मानसिकतामा अविलम्ब परिवर्तन गर्न जरुरी भएको बताउनुभयो । कार्यक्रममा सीमा अतिक्रमणसम्बन्धी कार्यपत्र प्रस्तुत गर्दै अर्का सीमाविद् बुद्धिनारायण श्रेष्ठले २०२९ सालदेखि नै सुस्ता क्षेत्रमा भारतीय अतिक्रमण जारी रहेको बताउनुभयो । "सीमा अतिक्रमण रोक्न तत्काल भारतीय पक्षसँग कुरा गर्नुपर्छ", उहाँले भारतसँग सीमा जोडिएका २६ जिल्लामध्ये २१ जिल्लामा सीमा अतिक्रमणको समस्या देखापरेको पनि बताउनुभयो ।इतिहासविद् डा. सुरेन्द्र केसीले यस किसिमको अतिक्रमणलाई टुलुटुलु हेरेर बस्नु भनेको नेपालीको निरीहपन र दासताबाहेक केही होइन भन्नुभयो । "सीमा अतिक्रमण र नदीनालाको विषयमा सिङ्गो राष्ट्र एक हुनुपर्छ तर हाम्रो देशमा स्पष्ट दृष्टिकोण नहुँदा राष्ट्रको जमिन मिचिँदा पनि कोही बोल्दैनन्", उहाँको भनाइ थियो । इतिहासविद् केसीले सिमाना सुरक्षाका बारेमा नेपाल सरकारले तत्काल नीति निर्माण गर्नुपर्ने बताउनुभयो ।