सामानुपातीक निर्वाचन प्रणाली कार्यान्वयन नभए वाईसियल आन्दोलनमा उत्रने

नेकपा माओवादीको युवा संगठन योङ्ग कम्युनिष्ट लिग (वाइसीएल) का केन्द्रीय अध्यक्ष गणेशमान पुनले संसदको विशेष अधिवेशनबाट परित गणतन्त्र र पूर्ण समानुपातिक निर्वाचन प्रणाली सम्बन्धि प्रस्ताव कार्यान्वयन नभए वाइसीएलले नेपाली युवाहरुको नेतृत्व गर्दै सशक्त आन्दोलन अगाडि बढाउने चेतावनी दिनु भएको छ ।
राष्ट्रियता र गणतन्त्रको लागि मेचीकाली गणतान्त्रिक यूवा मार्चको क्रममा सोमबार नवलपरासीको गैडाकोटमा आइपुग्नु भएका पुनले गैडाकोटमा बोल्दै सो चेतावनी दिनुभएको हो । उहाँले संसदबाट पारित प्रस्तावलाई संविधानमा उल्लेख गर्न समेत माग गर्नुभयो ।
नेपालका विभिन्न सिमाक्षेत्रमा चौतर्फीरुपबाट अतिक्रमण भैरहेको उल्लेख गर्दै वाइसीएलले नेपालको वास्तविक सिमानामा गएर किल्ला गाड्ने दावी गर्नुभयो ।भारतीय पक्षबाट पटक-पटक गरी १४ हजार हेक्टर जमिन अतिक्रमण भएको नवलपरासीको सुस्ताको निरीक्षण गरि वास्तविक सीमा निर्धारण गर्ने पनि उहाँले बताउनु भयो ।
गैडाकोटमा आईपुगेको एकसय पचास जनाको वाइसीएलको टोलीले सो स्थानमा मार्चपास समेत गरेको थियो । सो टोली सुस्ता निरीक्षणका लागि सोमबार नै त्यसतर्फ गएको छ ।