माओवादीका कारण सहमति हुन नसकेको शुशिल कोइरालाको आरोप

नेपाली कांग्रेसका कार्यवाहक सभापति सुशिल कोइरालाले नेकपा माओवादीको कारण अहिलेसम्म सहमति हुन नसकेको आरोप लगाउनु भएको छ ।
उहाँले माओवादीले पटक-पटक कुरा फेरेर अड्को थाप्ने गरेकाले संविधानसभाको चुनाव नभएको आरोप समेत लगाउनुभएको छ । माओवादीले कांग्रेसलाई गणतन्त्रमा जान नचाहेको भनी विभिन्न आरोपहरु लगाउँदै कांग्रेसका कारण चुनाव नभएको भन्नु गलत भएको उहाँको भनाइ छ ।
नेपाल प्रेस युनियनको राष्ट्रिय भेलाको उद्घाटन गर्दै कार्यवाहक सभापति कोइरालाले शुक्रबार यस्तो बताउनु भएको हो । उहाँले पत्रकारहरु राष्ट्रको चौथो अंग मात्रै नभएर प्रजातन्त्रको पहिलो स्तम्भ भएको पनि बताउनुभयो।
कार्यक्रममा प्रेस युनियनका अध्यक्ष समिरजंग साहले पत्रकारिता पेशा अप्ठ्यारोमा परिरहेका सबै पत्रकार एकजुट हुनुपर्नेमा जोड दिनुभयो ।
युनियनको शुक्रबारदेखि सुरुभएको भेलामा ७० जिल्ला युनियनका अध्यक्ष र पर्यवेक्षक गरी १सय २० जना पत्रकारहरुको सहभागीता रहेको छ । भेला शनिबारसम्म चल्ने युनियनले जनाएको छ ।