आज को अन्तरबार्ता

डा। रामवरण यादव, महामन्त्री, नेपाली कांग्रेस


महन्थ ठाकुरको राजिनामा र नयाँ पार्टी खोल्ने घोषणालाई कसरी हेर्नु भएको छ ?
पार्टी खोल्ने स्वतन्त्रता हुन्छ र प्रजातान्त्रिक अधिकार उपभोग गर्नुलाई अनुचित मान्न मिल्दैन । तर, मुलुकको अहिलेको अवस्था फुट्ने होइन जुटने हो । अहिले फुट्ने प्रवृति राष्ट्र र पार्टी कसैको पनि हितमा छैन । अहिले राष्ट्रिय एकता कायम गर्दै सबै सम्प्रदाय मिलेर अघि बढ्ने बेला हो ।

हिजो राजिनामा दिनेहरुले मधेशको समस्या समाधान भएन भन्नुभएको छ नि त ?
समस्या एकै दिनमा समाधान हुने समस्या होइन । २०१५ सालमा केही समय प्रजातन्त्र रह्यो । त्यसपछि ०४६ पछिको प्रजातन्त्रले पनि माओवादीबाट हतियार उठेका कारण लामो समय काम गर्न सकेन । लोकतन्त्र आएपछि मधेशको समस्या समाधान गर्न भनेरै संविधान संशोधन गरियो । संघीय गणतन्त्र र स्वयात्त सरकार भनिसकिएकै छ । अब हामीले गर्नुपर्ने भनेको संविधानसभा चुनाव हो । त्यसबाट मात्र मधेश पहाड सबैतिरको समस्या समाधान हुन्छ । यो घटनालाई मैले धमिलो पानीमा माछा मार्ने कामका रुपमा हेरेको छु ।

महन्त ठाकुरले किन पार्टी छाड्नुभयो जस्तो लाग्छ ?
हाम्रो पार्टीको 'सिनियर' नेता हो । उहाँलाई उपसभामुख बनाइएकै हो, नेपाली कांग्रेसको जुनसुकै सरकारमा उहाँ मन्त्री बन्नुभएकै हो । पार्टीमा पनि उहाँ कोशाध्यक्षसम्म बन्नुभयो । अहिले पनि उहाँ अनुशाषन समितिको संयोजक हुनुहुन्थ्यो । मेरो बिचारमा उहाँ प्रतिगामी तथा अस्थिरतावादीको चंगुलमा पर्नुभयो ।

उहाँको बहिर्गमनले मधेशमा के प्रभाव पर्ला ?
उहान्संग कस्ता मानिस गएका छन्, पार्टी फेर्दै हिड्नेहरु छन् । मधेशको समस्या समाधान गर्ने जादुको छडि छ, उहाँसँग ? मैले अघि नै भनिसके, अहिलेको बेला भनेको मधेशी पहाडी सबै मिलेर अघि बढ्ने बेला हो । हामीले त हतियार उठाएकाहरुलाई पनि शान्तिपूर्ण लोकतान्त्रिक प्रक्रियामा ल्याउन बल गर्नुपर्छ । यस्तो बेलामा अलग ग्रुप खडा गर्ने काममा राष्ट्र कमजोर पार्ने मनसाय देखिन्छ । तरल समयमा धमिलो पानीमा माछा मार्ने ढंगले उहाँ जानुभएकोमा मलाई दुख लागेको छ ।

मधेशमा के होला त अब ?
मधेशी जनता राष्ट्रिय एकताको पक्षमा छन् । मधेशी जनताले आफ्नो अधिकारका लागि उठाएको माग उचित छ । त्यसलाई लोकतान्त्रिक विधिबाट सम्बोधन गरिनुपर्छ । संघीयता र समानुपातिकको कुरा संविधानमा उल्लेख भइसकेको छ ।मधेशीहरुलाई राष्ट्रिय मूलप्रवाहमा समायोजन गर्ने नियम कानुन बनिसकेका छन् । ब्यवहारमा त एकै पटक कहाँ समानता आउँछ र ? कुनै पनि समस्या एकै पटक कहाँ समाधान हुन्छ र ? अहिले भनेको नियम कानुन अनुसार मुलकलाई समावेशी बनाउन लोकतान्त्रिक तरिकाले लडाइ लड्नुपर्ने बेला हो र त्यसका लागि संविधानसभा चुनाव आवश्यक छ । सबै मधेशी पहाडी मिलेर मात्र यो मुलुकलाई जोगाउन र अघि बढाउन सकिन्छ ।