सुरक्षा नभए काम नर्गन कर्मचारीहरुलाई निर्देशनः प्रजिअ पन्थी

सिराहा । सुरक्षाको माग गर्दै तराइका कर्मचारीहरु आन्दोलनमा रहेका बेला सिराहाका प्रमुख जिल्ला अधिरकारी बालकृष्ण पन्थीले जनताको कुनै पनि काम गर्दा सुरक्षा नभए काम नगर्न कर्मचारीहरुलाई निर्देशन दिएको छ । तराइका विभिन्न सशस्त्र समुहहरुबाट पिडीत भई आन्दोलनमा उत्रेका कर्मचारी तथा शिक्षक संयुक्त संघर्ष समिति सिराहाले बिहीबार लाहानमा आयोजना गरेको 'भावी आन्दोलन सम्बन्धमा वृहत छलफल तथा अन्तरक्रिया कार्यक्रममा बोल्दै प्रजिअ पन्थीले उक्त निर्देशन दिनु भएको हो । पन्थीले असुरक्षाका कारण कर्मचारीहरु काम बन्द गर्दा जनतालाई पर्ने असरबाट उत्पन्न समस्याको बारेमा नेपाल सरकारको जुनसुकै निकायलाई जवाफ दिन आफू तयार रहेको बताउनु भयो । सुरक्षा माग गर्दै कर्मचारीहरु आन्दोलन गरिरहेका बेला कर्मचारीहरुलाई सुरक्षा दिई काममा लगाउनुको सट्टा प्रजिअ पन्थीले असुरक्षा भए काम नगर्न निर्देशन दिएपछि सर्वसाधारन झन चकित भएका छन् । त्यसैगरी पन्थीले कर्मचारीहरुलाई सेवाग्रहीप्रति उतरादायित्व भएर काम गर्न समेत आग्रह गरेका छन् । साथै तराइमा आन्दोलनरत सशस्त्र समूहहरु राजनीतिक समूह नभई अपराधिक समूह रहेको आरोप लगाउदै उहाँले त्यस्ता अपराधिक कार्यमा संलग्न व्यक्तिहरुलाई कारबाहीको लागि सूचना दिई सहयोग गर्न कर्मचारीहरुलाई आग्रह गर्नुभएको छ । महोतरी, धनुषा, सर्लाही, सिराहा, सप्तरी लगायतका ११ वटा जिल्लाबाट नीजामति, वित्तियसंस्था लगायतका कर्मचारीहरु सहभागि भएको थियो । कार्यक्रममा उनीहरुले तराइका कर्मचारी आन्दोलनलाई निरन्तरता गर्न नेपाल पेशागत महासंघ तथा नेपाल नीजामति कर्मचारी संगठनका केन्द्रीय अध्यक्ष गणेश बस्याल समक्ष माग गरेपछि बस्यालले तराइका कर्मचारीहरुको आन्दोलनलाई केहीदिनमा देशव्यापी गर्ने प्रतिबद्धता व्यक्त गर्नु भयो ।