वैदेशिक हस्तक्षेपको खतराः

१२ डिसेम्बर, ०७ । नेपाल मजदुर किसान पार्टीका अध्यक्ष नारायणमान बिजुक्छे रोहितले मुलुकमा वैदेशिक हस्तक्षेपको खतरा बढ्दै गएको दाबी गर्नु भएको छ ।

आज बिहान क्रान्तिकारी विद्यार्थी संघले रुपन्देहीमा आयोजना गरेको पत्रकार भेटघाट कार्यक्रममा बोल्दै अध्यक्ष रोहितले मुलुकको ध्यान राजनीतिक संकटतिर केन्द्रित रहेको बेला विदेशीहरूले हस्तक्षेपको प्रयास सुरु गरेको बताउनु भयो ।
भारतले नेपालको सीमाक्षेत्रमा सडक निर्माण गर्नु र सीमा अतिक्रमण गर्नुलाई हस्तक्षेपको संज्ञा दिँदै रोहितले दलहरूबीचको विवादको फाइदा विदेशीले लिएको दावी गर्नुभयो । स्थानीय निकाय पुनर्स्थापना भए तराई समस्या समाधान हुने बताउँदै उनले सात दलको बैठकमा आफूले पटकपटक कुरा राख्दा कुनै सुनुवाई नभएको गुनासो पनि पोख्नु भयो । जमिन्दार र किसानबीचको विभेदले तराईमा समस्या झन् बढेको उनको भनाइ थियो ।