मौका परे राजालाई पनि भेट्ने नेकपा माओवादीका प्रवक्ता

नेकपा माओवादीका प्रवक्ता कृष्णबहादुर महराले माओवादी राजावादीसँग सम्बन्ध बढाउन इच्छुक रहेको जानकारी दिनुभएको छ। उहाँले राजावादी मन्त्री प्रकाश कोइरालासँग आफूले भेट गरेको स्वीकार्दै मौका परे राजालाई पनि भेट्ने बताउनुभयो।

अस्ति शुक्रबार एक टेलिभिजनमा प्रसारित अन्तर्वार्तामा पत्रकारले प्रतिप्रश्न गर्दा उहाँले राजावादीहरूलाई आफ्नो पक्षमा समेट्ने आफूहरूको नीति रहेको संकेत गर्दै भन्नुभयो– 'संविधानसभा सम्पन्न गर्न र भोलि गणतन्त्र आएपछि ती राजावादीहरू द्वन्द्व बढाउनेतिर नलागुन् भनेर माओवादीले लोकतन्त्रवादी, वामपन्थी र राजावादीहरू एउटै धारमा एक ढिक्का भएर लाग्नुपर्छ भनेको हो।' उहाँले प्रकाश कोइरालाबाहेक अरू राजावादीहरूसँग पनि भेट र कुराकानी भएको संकेत गर्नुभयो।

हेक्का रहोस्– राजा ज्ञानेन्द्रलाई जनताले र उच्चस्तरीय जाँचबुझ आयोगले जनआन्दोलनमा भएको ज्यादतीको लागि मुख्य दोषी ठहर गरेका छन्। आयोगले दोषी ठहर गरेकाहरूमा तत्कालीन शाही सरकारका सबै मन्त्री छन्, जसमा प्रकाश कोइराला पनि पर्छन् माओवादी पार्टीले आयोगले दोषी ठहर गरेकाहरूलाई सरकारले कारबाही नगरेमा आफूहरूले गर्ने भनी बनाएको नीति अनुरूप वाईसीएलसहितका माओवादी कार्यकर्ताहरू रमेशनाथ पाण्डे, दानबहादुर शाही, रूपज्योति, कमल थापा, लोकमानसिंह कार्की आदि धनाढ्य व्यक्तिहरूको घरमा गएर “अपराधीलाई सामाजिक बहिष्कार गरौं” भन्ने नारासहित विभिन्न “अपमानजनक नारा लेख्ने, गोप्य रूपमा चन्दा” माग्ने र धम्की दिने काम गरे, तर त्यही बेला माओवादीकै वरिष्ठ नेताहरू जनआन्दोलनका दोषी र राजावादीसँग बत्तीसपुतलीको “द्वारिका” सहित विभिन्न होटेलमा गोप्य मन्त्रणा गरिरहेका थिए। यस तथ्यले माओवादी नेताको अर्को भ्रष्ट चरित्र र विकृत अनुहार उदांग पारेको छ। महराले प्रकाश कोइरालासँग “अहिले हैन करिब डेढ महिना पहिले” भेट भएको भनी स्पष्टीकरण दिए पनि प्रकाशको हैसियत डेढ महिनाअघि जे थियो, अहिले पनि त्यही रहेको छ। उता प्रकाश कोइराला माओवादीको “फ्यान” भएका छन्। प्रकाशलाई माध्यम बनाउँदा कोइराला परिवारको आड लिन सकिने आशाले माओवादी नेताले यो माध्यम अपनाएको अनुमान गर्न सकिन्छ। तर प्रकाश २०४६ सालको आन्दोलनदेखि नै कोइराला–परिवारको कलंक र राजावादी मानिँदै आएका खोटो सिक्का हुन्। उनलाई न राजाले विश्वास गर्छन् न कांग्रेसले। तर माओवादीले प्रकाशलाई “राजाको प्रतिनिधि” ठानी उच्च व्यवहार गरेकोमा जानकारहरू चकित छन्।


यसबीच, राजदरबारसँग विश्वासमात्र केही अन्य व्यक्ति माओवादीको अर्को गुट–बादल, मोहन वैद्य आदिले सम्पर्क गरेको बुझिएको छ। यसरी सम्पर्क गरिएकाहरूमा राजाका पूर्व एडीसीहरू विवेक शाह, टीका धमला आदि रहेको बुझिन्छ। यी दुवै पूर्व जर्नेल राजाका अति विश्वासपात्रमध्ये गनिन्छन्। उनीहरू र माओवादीको सैन्यशक्तिसित सम्बद्ध एवं प्रचण्ड विरोधी गुटसँग भएको सम्पर्कले माओवादीभित्र दरबारसँगको निकट हुने भन्ने होडबाजीसमेत चलेको आशंका जन्माएको छ। गणतन्त्रवादीले यस्तो समयमा राजावादीलाई किन भेट्नुपर्‍यो भन्ने 'सगरमाथा' टेलिभिजनका पत्रकारको प्रश्नमा महराले बिना संकोच भने–राजावादीहरूलाई भेट्नु अपराध हो र? यसबीच धेरै राजावादीलाई भेटियो। मौका मिले राजालाई पनि भेटिएला।