सप्तरीलाई करमुक्त जिल्ला घोषणा गर्न माग

सप्तरी, २ पुस । सप्तरीलाई करमुक्त जिल्ला घोषणा गर्नुपर्ने भनी आज राजविराजमा आयोजित एक कार्यक्रममा व्यापारीहरूले माग गरेका छन् ।सप्तरी उद्योग वाणिज्य सङ्घका अध्यक्ष बालेश्वरप्रसाद साहको १३ औं दिनको पुण्य तिथिमा आज आयोजित श्रद्धाञ्जलि सभा कार्यक्रममा वक्ताहरूले सो माग गरेका हुन् । सभामा सप्तरी उद्योग वाणिज्य सङ्घका महासचिव सुरेशप्रसाद सिंहले सप्तरी जिल्लालाई करमुक्त जिल्ला घोषणा गरेमा बेरोजगार युवाहरू व्यापार क्षेत्रमा बढी सहभागी हुने बताउँदै युवा शक्ति व्यापारमा सामेल भए देशको अर्थतन्त्रमा सुधार आउने धारणा व्यक्त गर्नुभयो । उहाँले सप्तरीको औद्योगिक क्षेत्रको विकासका लागि चाँडै यहाँ औद्योगिक मेला आयोजना गरिने जानकारी दिनुहुँदै औद्योगिक संस्थाहरूलाई विद्युतमा ७५ प्रतिशत छुट दिनुपर्ने धारणा राख्नुभयो । उद्योग वाणिज्य सङ्घका उद्योग उपाध्यक्ष श्रीराम कावराको अध्यक्षतामा आयोजित श्रद्धाञ्जलि सभामा नेपाल सद्भावना पार्टीका जिल्ला अध्यक्ष धर्मनारायण रायले सप्तरी औद्योगिक क्षेत्रलाई सञ्चालनमा ल्याउन सबै पक्षसँग आग्रह गर्नुहुँदै त्यसका लागि आवश्यक पहल गरिने बताउनुभयो ।सभामा उद्योग वाणिज्य सङ्घका वाणिज्य उपाध्यक्ष शत्रुध्न गुप्ता, बजार व्यापार सङ्घका प्रदीप साह, पत्रकार प्रकाश खतिवडा, नागरिक समाजका थानसिंह भन्सालीलगायतले स्व. साहप्रति श्रद्धाञ्जलि व्यक्त गनुभयो ।