पार्टी छाड्नेहरु राजावादी भएको यादवको आरोप

१३ डिसेम्बर, ०७ । नेपाली कांग्रेसका महामन्त्री डा‌ रामवरण यादवले पार्टी छाडेका नेताहरू राजाबादी भएको आरोप लगाउनु भएको छ । आज प्रेस युनियन रूपन्देहीद्वारा बुटवलमा आयोजित पत्रकार सम्मेलनमा बोल्दै यादवले पार्टी छाड्नेहरूले गत वर्षदेखि नै द्वैध चरित्र देखाइरहेको बताउनु भयो । उनीहरु प्रतिगामीको खेलमा फसेका छन्­- यादवले भन्नु भयो - महन्थ ठाकुरबाहेक अरू सबै राजावादी हुन् । उनले छुट्टै मधेस आवश्यक नभएको र अहिले क्षेत्रीयताको कुरा उठाउने समय पनि नभएको बताए । मधेशका सबैजसो समस्या समाधान भइसकेका छन्- यादवले भन्नुभयो ।अन्तरिम सविधानको भावनाअनुसार दलहरू अघि बढे मधेसमा कुनै समस्या नहुने बताउँदै उहाँले संसदबाट गणतन्त्र घोषणा गर्ने र सविधानसभापछि कार्यान्वयन गर्ने सहमति दलहरुबीच भइसकेको बताउनु भयो ।