नेपाल-चीन जोड्ने दोस्रो राजमार्ग तीन वर्षमा बन्ने

नेपाल-चीन जोड्ने दोस्रो राजमार्गको निर्माणकार्य आउँदो छ महिनभित्र सुरु हुने भएको छ। चीन सरकारको आर्थिक तथा प्राविधिक सहयोगमा बन्ने रसुवागढी-स्याफ्रुबेंसी राजमार्गको निर्माणकार्य आगामी वर्षको जेठ महिनामा सुरु हुने तथा काम सुरु भएको २८ महिनाभित्र निर्माणकार्य सक्ने लक्ष्य राखिएको छ।
सडक निर्माणको जिम्मा पाएको चीनको तिब्बतको होङ्ची कन्स्ट्रक्सन इन्डस्ट्रियल ग्रुपका महाप्रबन्धक यु मिङगाङ तथा नेपालका तर्फबाट सडक विभागका महानिर्देशक तुलसी सिटौलाबीच सडक निर्माणकार्य सम्बन्धी सम्झौतापत्रमा हालै हस्ताक्षर भएको चिनियाँ सञ्चार माध्यमहरुले जनाएका छन्।
उक्त सडक निर्माण गर्ने विषयमा नेपाल र चीन सरकारका बीच सन् २००१ को मे ४ मा समझदारीपत्रमा हस्ताक्षर भएको थियो। नेपालबाट सुरुमा प्रस्तावित २२ किलोमीटर लामो बाटोलाई चिनियाँ प्राविधिकहरुले नयाँ डिजाइनिंग गरी १६ किलोमीटरमा झारेका थिए।
हाल सञ्चालनमा रहेको नेपाल-चीन जोड्ने पहिलो र एकमात्र अरनिको राजमार्ग पनि चीन सरकारकै आर्थिक तथा प्राविधिक सहयोगमा निर्माण भएको हो।