गणतन्त्र घोषणा गरे गृहयुद्ध हुने दावी

नेपाली कांग्रेसका केही नेताहरुले माओवादी र बाम पार्टीसँग पार्टीको सहकार्यबिरुद्ध संगठित आवाज उठाएका छन् ।
नेपाली कांग्रेसका केही नेताहरुले बामपन्थीहरुसँग सहकार्य गर्नु गलत भएको तथा बामपन्थीहरुसँगको सहकार्यले पार्टीको पहिचान समाप्त हुदै गएको बताएका छन् । 'बीपी चिन्तन प्रतिष्ठान' ले मङ्सिर २२ गते राजधानीमा गरेको 'लोकतन्त्रमाथी खतरा र यसको निराकरण' बिषयक कार्यक्रममा उनीहरुले माओवादी ज्यादतीको नेपाली कांग्रेस र प्रधानमन्त्री समर्थक बनेको पनि आरोप लगाए । संसदबाट गणतन्त्र घोषणा भए मुलुकमा गृहयुद्ध हुने पनि उनीहरुको भनाइ थियो ।

माओवादी र बामपन्थी पार्टीसँग पार्टीको सहकार्यबिरुद्ध आवाज उठाउनेमा महामन्त्री केबी गुरुङ, खुमबहादुर खड्का, बिजय गच्छेदार, गोबिन्दराज जोशी, बिनयध्वज चन्द लगायत नेताहरु थिए । कार्यक्रममा बोल्दै महामन्त्री गुरुङ्गले माओवादीले जे भन्यो त्यो हुने तथा माओवादीले जे अह्रायो कांग्रेसले त्यो मान्ने दिन गएको बताए । कम्युनिष्टहरुले संसदलाई बोकाको टाउको देखाएर कुकुरको मासु बेच्ने थलोजस्तो बनाएको पनि गुरुङले कार्यक्रममा उल्लेख गरे ।

केन्द्रीय सदस्य गोविन्दराज जोशीले वामपन्थीसँग कांग्रेसले गरेको सहकार्यको फल आज देश र कांग्रेसले भोगिरहेको बताए । 'गिरिजाप्रसाद राष्टपति र प्रचण्ड प्रधानमन्त्री बने यो देशको झन के हाल होला' जोशीको भनाइ थियो । कांग्रेस नेताहरु विजय गच्छदार र खुमबहादुर खडकाले नेपाली कांग्रेसले कम्युनिष्टको पुच्छर समातेर हिडेसम्म देशको अवस्थामा सुधार नआउने तथा राष्ट्र विखण्डन हुने दावी गरे ।