माओवादी बाधक हैन प्रचण्ड

नेपालको पाँचदिने भ्रमणमा रहेको चिनियाँ प्रतिनिधिमण्डलले नेपालमा विद्यमान राजनीतिक समस्यालाई नेपालीहरू आफैँले सुल्झाउनुपर्ने कुरामा जोड दिएको छ । सोमबार बिहान नेपाल कम्युनिस्ट पार्टी(माओवादी)का वरिष्ठ नेताहरू र चिनियाँ प्रतिनिधिमण्डलबीच करिब दुई घण्टा चलेको कुराकानीमा नेपालको पछिल्लो राजनीतिक अवस्था, संविधानसभाको चुनाव र शान्तिप्रक्रियाको विषयमा छलफल भएको थियो ।
कुराकानीपछि पत्रकारहरूसँग कुरा गर्दै नेकपा (माओवादी)का अध्यक्ष प्रचण्डले माओवादी पार्टी कान्तिप्रक्रियाप्रति दृढ रहेको जानकारी चिनियाँ पक्षलाई गराएको उल्लेख गर्नुभयो । उहाँले माओवादी संविधानसभाविरोधी भएको कुरा सुनिन्छ नि ! भनी कुरा उठेकोमा माओवादी पार्टी संविधानसभाको विरोधी नभएको र केही प्रक्रिया मात्र नमिलेको बताएको उल्लेख गर्नुभयो । उहाँले कुराकानीमा चिनियाँ नेताहरूलाई संविधानसभाको निर्वाचन निर्धारित मितिमा सम्पन्न गराउन माओवादी पार्टी वाधक नभएको विश्वास दिलाएको पनि बताउनुभयो ।
चिनियाँ पक्षबाट शान्तिप्रक्रियाप्रति व्यक्त गरिएको चिन्तामा नेपालको शान्तिप्रक्रिया सफल हुने र छलफलहरू पनि हुँदै जाने जानकारी गराएको पनि अध्यक्ष प्रचण्डले प्रस्ट पार्नुभयो । उहाँका अनुसार अन्तराष्ट्रिय साम्यवादी आन्दोलनका सर्न्दर्भमा पनि कुराकानी भएको थियो । नेकपा (माओवादी)का नेता प्रचण्डले चिनियाँ प्रतिनिधिमण्डलसँगको कुराकानीमा शान्तिप्रक्रियालाई धरापमा पारेर सातदलीय गठबन्धनबाट माओवादी पार्टी बाहिरिने बताउनुभएको पनि थाहा भएको छ । उहाँले कुराकानीमा नेकपा (माओवादी) पार्टीको लक्ष्य जनयुद्धकालदेखि नै संविधानसभाको चुनाव गराउनु रहेको प्रस्ट पार्नुभएको पनि बताइएको छ ।
यसैगरी पत्रकारहरूसँगको कुराकानीमा चिनियाँ प्रतिनिधिमण्डलका नेता वाङले चीनको अहस्तक्षेपको नीतिलाई फेरि एकपटक उल्लेख गर्दै नेपालीहरू आफैले आफ्ना आन्तरिक विवादहरू समाधान गर्नुपर्छ भन्नुभयो । उहाँले चीनले नेपालको आन्तरिक मामिलामा हस्तक्षेप गर्न खोजेको नभई चासो मात्र देखाएको प्रस्ट पार्नुभयो र नेपालको राजनीतिक समस्यालाई सबै दल मिलेर समाधान गर्नुपर्ने कुरामा पनि जोड दिनुभयो ।
वाङले चीनले नेपालमा शान्तिप्रक्रिया सफल भएको हेर्न चाहेको उल्लेख गर्दै नेपाललाई चिनियाँ सहयोग जारी रहने विश्वास पनि दिलाउनुभयो । उहाँले नेपालको शान्तिप्रक्रिया सकारात्मक दिशातर्फउन्मुख भएको विचार पनि व्यक्त गर्नुभयो । कुराकानीमा नेकपा (माओवादी)का तर्फाट अध्यक्ष प्रचण्ड, वरिष्ठ नेता डा. बाबुराम भट्टर्राई, नेताहरू मोहन वैद्य किरण, रामबहादुर थापा बादल, सीपी गजुरेल, कृष्णबहादुर महरालगायत नेताहरू उपस्थित हुनुहुन्थ्यो भने चिनियाँ पक्षको नेतृत्व चीनको अन्तराष्ट्रिय विभागका मन्त्री तथा चिनियाँ कम्युनिस्ट पार्टी पोलिटब्युरो सदस्य वाङ झाउरीले गर्नुभएको थियो ।