मधेश समस्या समाधानका लागी प्रमद्वारा मधेशी सांसदसहरु संग छलफल

मधेश समस्या समाधानका उपायबारे प्रधानमन्त्री गिरिजाप्रसाद कोइरालाले बिहीबार मधेशबाट प्रतिनिधित्व गर्ने कांग्रेस सांसदहरुसँग छलफल गर्नुभएको छ।
प्रधानमन्त्री निवास बालुवाटारमा बोलाई मधेशका २० जिल्लाका सांसदहरुसंग छलफल गर्नुभएको कांग्रेसका मुख्य सचेतक आनन्द प्रसाद ढुंगानाले जानकारी दिनुभयो ।
भेटमा तराई समस्या समाधानका उपाय मधेशी सांसद तथा मन्त्री राजीनामा लगायतबारे छलफल भएको बालुवाटार स्रोतले बताएको छ । दुई दिन अघि सरकार र संसदबाट मधेशको समस्या सम्बोधन गर्न नसकेको भन्दै मन्त्री तथा कांग्रेस नेता महन्थ ठाकुरसहित चार जना सांसदले राजीनामा गरेका थिए ।
यसैबीच कांग्रेस महामन्त्री डा.रामबरण यादवले तराईका राजनीतिक मुद्दालाई सरकारले विभिन्न समयमा पुरा गर्दै आएको बताउनु भएको छ । अन्तरिम संविधानले समेत उनीहरुका मागलाई प्रत्याभुत गरिसकेकाले अब मधेशीका लागि छुट्टै मधेशको दल आवश्यक नभएको उहाँले बताउनुभयो ।
भर्खरै संसद र पार्टीबाट राजीनामा दिने मधेशी नेताहरुलाई लक्षित गर्दै यादवले मधेशको हितमा राजीनामा दिएका मधेशी नेताहरु राजावादी अस्थिरतावादी र प्रतिक्रियावादीको जालोमा फसेको आरोप लगाउनुभयो ।