राजा ज्ञानेन्द्र र प्रचण्डको मिलिमतो पुष्टि भएको छ

माओवादी र दरबारको अघोषित साँठगाँठ रहेको मन्त्री गुरुङले आरोप लगाउँदै “प्रचण्डको भनाइ मण्डले राष्ट्रवादको नमुना हो। यसबाट राजा ज्ञानेन्द्र र प्रचण्डको सम्बन्ध पुष्टि भएको छ।” राजावादीहरू कहिल्यै पनि राष्ट्रवादी हुन नसक्ने मन्त्रीको धारणा थियो। रिपोर्टर्स क्लबमा सम्पन्न कार्यक्रममा पत्रकारहरूको प्रश्नमा एमालेका तर्फबाट संस्कृति, पर्यटन एवं नागरिक उड्ययन मन्त्री पृथ्वीसुब्बा गुरुङले उक्त कुरा बताउनु भएको हो।
उम्त अवसरमा मन्त्री पृथ्वीसुब्बा गुरुङले सन् २००९ लाई भिजिट नेपाल वर्ष मनाइने जानकारी दिएका छन्। “यसका लागि छलफल चलिरहेको छ,” शनिबार रिपोर्टर्स क्लब नेपालको साक्षात्कार कार्यक्रममा मन्त्री गुरुङले भने, “अब छिट्टै मन्त्रिपरिषद्बाट औपचारिक निर्णय लिइनेछ, भिजिट नेपाल नमनाएको १० वर्ष लागिसक्यो ।”
राज्यको श्वेतआतंक र माओवादीको लालआतंकबाट पर्यटन क्षेत्र प्रताडित भएको मन्त्री गुरुङले बताए। “पर्यटकमाथि कुटपिट आपराधिक काम हो,” उनले भने, “पीडित पर्यटकलाई भेट्न म पोखरा जाँदैछु। अब पर्यटकबाट चन्दा असुले राज्यलाई सैह्य हुँदैन।”
मन्त्री गुरुङले माओवादीले पर्यटनको विकासमा बाधा पुर्‍याएको आरोप लगाए। “पर्यटकको कुटपिट, चन्दा आतंकबाट रेड टेरर सिर्जना भएको छ,” मन्त्री गुरुङले भने, “माओवादी गतिविधिले नेपालको अन्तर्राष्ट्रिय छवि नै बिगारेको छ।”
पर्यटक पिट्ने आफ्ना कार्यकर्तालाई कारबाही गर्न मन्त्री गुरुङले माओवादीलाई चुनौती दिए। उनले भने, “कि माओवादीले त्यस्ता कार्यकर्तालाई कारबाही गर्नुपर्‍यो कि सरकारले गरेको कारबाहीमा बाधा पुर्‍याउनुभएन।” पर्यटन विकासको पूर्व सर्त सुरक्षा भएको चर्चा गर्दै उनले आम नताका निम्ति उपयोगी हुने छुट्टै सांस्कृतिक र पर्यटन नीतिको आवश्यक रहेको बताए।
धमिजा, लाउडा, चाइना साउथ वेस्ट काण्डले धराशायी भएको नेपाल वायुसेवा निगम (एनएसी) लाई आफूले निजीकरण गर्न चाहेको बताए। “सुधारका काममा पनि हरेक शक्तिकेन्द्रमा कमिसन ठूलो खेल हुने भएकाले मैले जहाज किन्ने निर्णय गराउन सकेको छैन,” उनले भने, “एनएसीलाई कमिसनमुक्त र भ्रष्टाचारमुक्त बनाउन महाप्रबन्धक हटाउन आवश्यक छ।” एनएसीलाई दुईटा जहाज मर्मत र एउटा नयाँ जहाज किन्ने तयारीमा लागेको उनले जानकारी दिए। साथै महाप्रबन्धक हटाउने प्रस्ताव मन्त्रिपरिषद्मा लगे पनि आफू सफल नभएको उनले स्वीकारे। त्रिभुवन विमानस्थललाई १५ वटासम्म जहाज अटाउन सक्ने खालको बनाउने कार्ययोजना आवश्यक रहेको उनले औंल्याए। सहरकेन्द्रित पर्यटनलाई गाउँमुखी बनाउनुपर्ने मन्त्रीको धारणा थियो। सिभिल एभिएसन मास्टर प्लान, काठमाडौं विमानस्थलको सुदृढीकरण, डुमरवाना अन्तर्राष्ट्रिय विमानस्थल निर्माणलगायतका आवश्यकता उनले औंल्याए।



होटेल एसोसिएसन अफ नेपालका उपाध्यक्ष प्रसिद्धबहादुर पाण्डेले माओवादी कार्यकर्ताबाट पर्यटकमाथि भएको हमलाले पर्यटन व्यवसायी स्तब्ध भएको बताए। “यस वर्ष पर्यटकको संख्या पाँच लाख नाघ्छ,” उनले भने। पाण्डेले पछिल्लो घटनाले पर्यटकहरू घट्ने चिन्ता प्रकट गरे। पर्यटन व्यवसायलाई भिजिट नेपाल जीवन पद्धतिको रूपमा विकास गरिनुपर्नेमा उनको भनाइ थियो। भिजिट नेपाल मनाउन आवश्यक रहेको उनले बताए।


टानका अध्यक्ष ज्योति अधिकारीले पर्यटकमाथि शान्तिपूर्ण राजनीतिमा आइसकेको माओवादी पक्षबाट भएको आक्रमण जोड दिए। कुटपिटबारे माओवादीको उच्च नेतृत्वसित कुराकानी भएको र उसले आइन्दा कारबाही हुने आश्वासन पाएको उल्लेख गरे।


नेपाल पर्वतारोहण संघका अध्यक्ष आङछिरिङ सेर्पाले पर्यटकमाथि कुटपिट भइरहे नेपालको प्रतिष्ठा घट्नुका साथै पर्यटकको आवागमन पनि घट्ने बताए। द्वन्द्वकालमा पनि पर्वतारोही पर्यटकको कमी नआएको उनको भनाइ थियो।
नेपाल च्याम्बर अफ कमर्सका अध्यक्ष सुरेन्द्रवीर मालाकारले राज्यले तत्काल पर्यटन क्षेत्रका निम्ति नयाँ नीति तर्जुमा गर्न आवश्यक रहेको बताए। अहिले राजनीतिक एजेन्डामा मात्र अल्मलिएको चर्चा गर्दै मालाकारले तत्काल आर्थिक एजेन्डामा ध्यान दिन नसके मुलुकको अर्थतन्त्र टाट पल्टने चेतावनी दिए।
नेपाल एसोसिएन अफ ट्राभल एन्ड ट्ुर्स (नाटा) का अध्यक्ष रामकाजी कोनेले पर्यटन क्षेत्र पहिलेभन्दा राम्रो भए पनि दीर्घकालीन योजना आवश्यक रहेको औंल्याए।