'निकास निस्कने निश्चित छैन'

माओवादी अध्यक्ष प्रचण्डले राजनीतिक निकास निस्कने सम्भावना धेरै भए पनि अझै निश्चित नभएको बताएका छन् ।
माओवादी अध्यक्ष प्रचण्डले जारी राजनीतिक संकटको निकास मङ्सिर २८ गतेसम्म निस्कने बताएका छन् । मधेशी राष्ट्रिय मुक्ति मोर्चाको दुई महिनाअघि जनकपुरमा सम्पन्न अधिवेशनको मङ्सिर २६ गते जनकपुरमा समापन सभामा बोल्दै प्रचण्डले गतिरोध अन्त्यका लागि सकारात्मक संकेत देखिए पनि गतिरोध पूरै अन्त्य भने नभएको उल्लेख गरे । २८ गतेसम्म पनि राजनीतिक समस्या समाधान नभए पुन ऐतिहासिक आन्दोलन गरिने प्रचण्डको भनाइ थियो । कार्यक्रममा प्रचण्डले नेपाली कांग्रेस र सरकारका कारण मङ्सिरमा चुनाव हुननसकेको बताउदै चैतमा चुनाव गराउने सहमति गरे आफ्नो पार्टी तयार रहेको उल्लेख गरे । चैतमा चुनाव गराउँने भए सरकार र नेपाली कांग्रेसले सफा नियत राख्नुपर्ने प्रचण्डको भनाइ थियो । तर, सफा नियत भनेको के हो भन्नेबारे भने उनले केही खुलाएनन् ।

मधेशमा छुट्टै पार्टी खोल्न संसदबाट राजिनामा दिएकाहरुबारे प्रचण्डले मधेशी जनतालाई फुटाउने चाल भने । माओवादीले मधेशी जनताको मुक्तिकै लागि भनेर बिद्रोह गरेको दावी गर्दे प्रचण्डले अहिले मधेशमा भगौडा र डाकाहरु सक्रिय रहेको तथा उनीहरुको भ्रममा परे दुर्घटना हुने बताए । मधेशको मुक्त सही बिचारबाट मात्र हुनसक्ने तथा सही बिचार माओवादीसँग मात्र भएको प्रचण्डको दावी थियो । कार्यक्रमा प्रचण्डले मधेशीका लागि पार्टीको नयाँ नारा 'गर्व से कहो हम मधेशी छि, बिदेशी दलाल नहि राष्ट्रवादी छि' पनि सुनाएका थिए ।

कार्यक्रमका अर्का वक्ता माओवादी केन्द्रीय सदस्य मात्रृका यादवले संसदबाट राजिनामा दिएकाहरुसँगै आफ्नो पनि नाम जोडिएको उल्लेख गर्दै पार्टी छाडेर आफू अन्यत्र जान नसक्ने बताए । संसद तथा पार्टीबाट राजिनामा दिनेहरुले गिरिजा र माधव नेपालसँग मात्र बिद्रोह गरेका हुन् या बिदेशीको इसारामा बिद्रोह गरेका हुन् भन्ने हेर्न बाँकि रहेको पनि कार्यक्रममा उनले बताए । यादवले माओवादीले क्रान्तिको बाटो छाडे भने आफू पनि अन्यत्र जान सक्ने उल्लेख गरे ।

जनकपुरमा प्रचण्डले २७ गते पत्रकार सम्मेलन गर्नेछन तथा दिउँसो शहिद परिवारसँग भेटी बेलुका राजधानीमा र्फकनेछन् ।