नेकपा माओवादीका अध्यक्ष प्रचण्डद्वारा सरकारमा फर्कने संकेत

नेकपा माओवादीका अध्यक्ष प्रचण्डले सरकारमा फ्कने संकेत गर्नुभएको छ । २६ मंसिरमा क्रान्तिकारी पत्रकार संघ मकवानपुरद्वारा आयोजित पत्रकार भेटघाट कार्यक्रममा उहांले वर्तमान सरकार पुर्नगठन भए माओवादी सरकारमा फर्कने बताउनुभएको हो । तपाईंहरु सरकारमा फर्कनुहुन्छ भन्ने प्रश्नमा प्रचण्डले भन्नुभयो,'मन्त्री मण्डल पुर्नगठन भएर रक्षा,गृह र अर्थ बांडफांड भए फर्कनसक्छौं ।'उहांले मंसिरभित्रै राजनीतिक निकास निस्कने बताउनुभएको छ । उहांले मंसिरभित्रै सात दलको सहमतीमा संविधान संशोधन गर्ने खुलासा गर्नुभयो ।नेपाली कांग्रेस लचिलो भएर प्रस्तुत भएकाले निकासको सम्भावना बढेको उहांको भनाई थियो । प्रचण्डले भन्नुभयो,'नेपाली कांग्रेस गणतन्त्र र समानुपातिकको मुद्यामा लचिलो भएकोले निकास निस्कन्छ ।' २५ मंसिरको सांझ उहां हेटौंडा आइपुग्नुभएको हो । प्रचण्डसंग श्रीमति सीता पौडेलका अलावा बरिष्ठ नेताहरु डा. बाबुराम भट्टर्राई,रामबहादुर थापा बादल र मातृका यादव पनि हुनुहुन्छ ।प्रचण्डले मन्त्री र सांसदबाट राजीनामा दिएका तर्राईका नेताहरुलाई माओवादीमा आवद्ध हुन आग्रह गर्नुभयो । ' उहांहरुले तर्राई निम्ति राजीनामा दिनुभएको हो भने माओवादीमा आउनुपर्छ',प्रचण्डले भन्नुभयो । माओवादीका केन्द्रीय सदस्य नेता मातृका यादवले तर्राईका जनताहरुको माग सम्बोधन हुनु पर्ने बताउनुभयो । अन्य दल तर्राईका जनताप्रति जिम्मेवार नभएको ठहर उहांको थियो । कार्यक्रम क्रान्तिकारी पत्रकार संघ मकवानपुरका अध्यक्ष कौशल पाण्डेको सभापतित्वमा सम्पन्न भएको थियो ।