हतियार नछाडेकाले तराईमा सरकारले वार्ता गर्ने सकेन

तराईमा आन्दोलनरत समुहले हतियार नछाडेकाले सरकारले उनीहरुसँग वार्ता गर्न नसकेको सामान्य प्रशासन राज्यमन्त्री रामचन्द्र यादवले बताउनुभएको छ ।
सरकारी वार्ता टोलीका सदस्यसमेत रहेका यादवले सर्वसाधरण र कर्मचारीमाथि आतंक र ज्यादत्ति कायम राखेकाले ती समुहसँग वार्ता हुन नसकेको बताउनुभयो ।
प्रेस चौतारी कास्कीले मंगलबार पोखरामा गरेको पत्रकार भेटघाटमा राज्यमन्त्री यादवले तराईमा आन्दोलनरत पक्ष सहमतिमा नआएपनि सरकारले चैत महिनाभित्र संविधानसभा चुनाव गरेरै छाड्ने जिकिर गर्नुभयो ।
उहाँले बुधबारसम्म बस्ने सातदलको बैठकले चुनावको मिति घोषणा गर्ने जानकारी दिनुभयो । यादवले अगाडि भन्नुभयो, चैतभित्र चुनाव नगरे मुलुक झन् दलदलमा फस्ने भएकाले अब सरकारका लागि चुनाव निरविकल्प हो ।
हतियार, धम्की र आतंकले तराईको भलो नहुने भन्दै उहाँले संघर्षरत समुहलाई हतियार त्यागेर वार्तामा आउन आग्रह गर्नुभयो । उहाँले भन्नुभयो, हतियार छाडेर वार्तामा आउँछन् भने सरकार उनीहरुका माग पूरा गराउन गम्भीर छ ।
उहाँले तराईको जस्तै मुलुकमा दलित, महिला जनजाति, कर्णालीको समस्या रहेको उल्लेख गर्दै कुनै छुट्टै दल खडा गरेर मात्र तराईको समस्या समाधान नहुने जिकिर गर्नुभयो । मुलधारको राजनीतिक दल त्यागेर तराई मुलका नेताहरुले नयाँ दल गठन गरेकोमा असन्तुष्टि प्रकट गर्दै उहाँले ती नेताहरुले समस्या झन् चर्काएको आरोप लगाउनुभयो । उहाँले भन्नुभयो, सातदललाई बाइपास गर्दै नयाँ दल खोलेर टायर बाल्दैमा तराईको समस्या समाधान हुँदैछ ।
यसैबीच उहाँले संविधानसभाको मिति घोषणा गर्नुअघि पाँचै विकास क्षेत्रमा क्षेत्रीय प्रशासक नियुक्त भइसक्ने जानकारी दिनुभयो ।