दुई हजार ८०० बिघा घरजग्गा र सम्पत्ति माओवादीको कब्जामा

बर्दिया, २१ पुस । बर्दिया जिल्लामा दुई हजार ८०० बिघा घरजग्गा र सम्पत्ति माओवादीको कब्जामा रहेको बताइएको छ । तेइसबुँदे सहमतिपछि पनि माओवादीले कब्जा गरिएका घरजग्गा र सम्पत्ति फिर्ता गराउन कुनै पहल नगरेको नेपाली काङ्ग्रेस, बर्दियाका सहसभापति सञ्जय गौतमले बताउनुभयो ।राष्ट्रिय निर्वाचन अनुगमन सञ्जाल जिल्ला कार्यसमितिद्वारा आयोजित कार्यक्रममा गौतमले कब्जा गरिएका घरजग्गा फिर्ता र बेपत्ताहरुको स्थिति र्सार्वजनिक नहुँदासम्म संविधानसभाको निर्वाचन हुने कुरामा शङ्का व्यक्त गर्नुभयो ।नेकपा - माओवादीका जिल्ला सदस्य आनन्द सुवेदीले कब्जा गरिएका घरजग्गा र सम्पत्ति फिर्ता गराउन आफूले पहल गरेको र २३ बुँदे सहमतिपछि हालसम्म तीनजनालाई स्थापित हुन अनुमति दिएको बताउनुभयो ।नेकपा -एमालेका हरि ज्ञवाली र मधेसी जनाधिकार फोरमकी केन्द्रीय सदस्य तोफा यादवले माओवादीका चरित्र र व्यवहार नसच्चिएसम्म संविधानसभाको सुनिश्चितता बन्न नसक्ने धारणा व्यक्त गर्नुभयो ।