धनुषा स्थित माओवादी कार्यलयमा बम विष्फोट

जनतान्त्रिक तराई मुक्ति मोर्चा ज्वालासिंह समूह सोमबार बिहान धनुषामा एक युवकलाई सुराकीको आरोपमा गोली हानी हत्या गरेको छ भने जनकपुरस्थित माओवादीको जिल्ला कार्यालयमा बम विष्फोट गराइएको छ।
काठमाडौबाट सोमबार बिहान धनुषाको पुष्पपुरको सिद्धनगरस्थित घर जाँदै गरेका करिब ३५ वर्षिय मदनकुमार लामालाई ज्वालासिंह समूहको टाइगरसिंहको नेतृत्व समूहले गोली हानी हत्या गरेको बताएको छ।
लामाले आफूविरुद्ध सुराकी गरेको आरोपमा सोमबार बिहान सात बजेतिर त्यहाँस्थित जग्दर खोलामा गोली हानी सफाया गरिएको मोर्चाका केन्द्रीय सदस्य राजन मुक्तिले बताएका छन् । यद्यपि प्रहरीले भने लामाको शव नभेटेको जनाएको छ।
त्यसैगरी मोर्चाका कार्यकर्ताले गएराति जनकपुर नगरपालिकाको रजौरस्थित माओवादीको जिल्ला समितिको कार्यालयमा पेट्रोल बम विष्फोट गराएको छ। बम विष्फोटनमा मानवीय क्षति भने नभएको प्रहरीले जनाएको छ।