आवश्यक परेको खण्डमा सेना परिचालन हुने

नेपाली कांग्रेसका नेता शुसील कोइरालाले निर्वाचनमा आवश्यक परेको खण्डमा मधेसमा नेपाली सेना परिचालन हुनसक्ने बताउनुभएको छ । लाहानमा प्रेस युनियनले आज विहान आयोजना गरेको पत्रकार सम्मेलनमा कोइरालाले उक्त कुरा बताउनुभएको हो । सम्मेलनमा कोइरालाले देश बिखण्डल बाहेक तराईको हरेक माग सरकारले पुरा गर्ने भन्दै तराईका सशस्त्र समुहहरुलाई वार्तामा आउन पनि आग्रह गर्नुभयो । साथै कोइरालाले अहिले पनि तराइमा सुरक्षाको स्थिति आफूले नाजूक पाएकोले तराइको जनतालाई भरपर्दो सुरक्षा दिन आग्रह गर्दै सशस्त्र समूहहरु हतियार त्यागेर वार्तामा आए उनीहरुलाई पूर्ण सुरक्षा दिएर वार्ता सम्पन्न गरी संविधानसभाको चुनाव गराउने समेत बताउनुभयो । त्यसैगरी, कांग्रेसका महामन्त्री रामबरण यादवले अहिले तराइमा व्यापक रुपमा आत्मनिर्णयको अधिकार माग भइरहेकोले आत्म निर्णयको अधिकार सरकारले कहिल्यै पनि नदिने दाबी गर्नु भयो । उहाँको भनाइ थियो- आत्म निर्णयको अधिकार दिएपछि देश बिखण्डन हुने समेत यादवले बताउनु भयो । सोही कार्यक्रममा गृहराज्यमन्त्री रामकुमार चौधरीले सिराहा र सप्तरीका पत्रकारहरुले भयानक समाचारहरु लेखेर देशमा अहिले आतंक मच्चाइरहेको आरोप लगाउनु भएको छ । शुक्रबार सिराहाको लाहानमा आयोजित एक कार्यक्रममा बोल्दै उक्त कुरा बताउनु भएको हो । चौधरीले आफू गृह नगर सप्तरीको राजविराज आएको बेला कुनै प्रकारको बिस्फोट नभएको भन्दै पत्रकारहरुले आफू माथि पूर्वाग्रही तरिकाले समाचार लेखी आतंक मच्चाएको बताउनु भयो । मन्त्रीको यो भनाईप्रति पत्रकारहरुले असहमति जनाएपछि मन्त्री र पत्रकारहरुबीच भनाभन समेत भएको थियो ।