सहारा क्लबलाई सडन डेथमा हराउदैँ पुलिस फाइनलमा

पोखरा, २५ पुस/सहारा क्लबको भाग्यमा फेरी एकपटक पेनाल्टी सुटआउट तगारो बन्दा टोली बुधबार छैटौं आहा गोल्डकपको फाइनल प्रवेश गर्न अफसल भयो भने दुइ पटकको पूर्व विजेता नेपाल पुलिस क्लब छैटौं पटक उपाधिको संघारमा पुगेको छ । क्याराभान गोल्डकपका नाममा आयोजित पहिलो संस्करण तथा पहिलो आहा गोल्डकपको विजेता पुलिसले पोखरा रंगशालमा हिजोको अन्तिम चार भिडन्तमा आयोजक सहारा क्लबलाई सडन डेथमा ७-६ले निराश पार्‍यो । १ सय २० मिनेटसम्म शहीद स्मारक लिग विजेता तथा एएफसी प्रेसिडेण्ट्स कपको उपविजेता पुलिस विरुद्ध डटेर प्रस्तुत भएपनि सडन डेथमा विष्णु गुरुङले प्रहार गरेको सातौं पेनाल्टी विपक्षी गोलकिपर रितेश थापाले बचाउँदा सहारा फेरी एकपटक पेनाल्टीको शिकार बन्यो । यसअघि क्याराभान गोल्डकपको सेमिफाइनलमा पनि पुलिससँग सहाराले यस्तै नियति भोग्नुपरेको थियो । टाइब्रेकरहुदै सडन डेथका ११/११ पेनाल्टी हान्दापनि खेल बराबरी भएपछि निर्णयार्थ टस गरिदाँ सहाराले पुलिसलाई फाइनलको बाटो खुला गर्नुपरेको थियो । त्यस्तै गतवर्षबुढासुब्बा गोल्डकपको सेमिफाइनलमा पनि सहारा अफ्रिकन युनाइटेडसित टाइब्रेकरकै भएको थियो । पहिलो पटक घरेलु आहा गोल्डकपको फाइनलमा प्रवेश गर्ने लक्ष्यमा रहेको सहाराले सातवटा पहेलो कार्ड वषिर्एको खेलको निर्धारित समय पुलिसलाई २/२ को बराबरीमा रोकेको थियो । थप गरिएको अतिरिक्त ३० मिनेटमा दुवैतर्फाट गोल हुन नसक्दा खेल निर्णयार्थ पेनाल्टी सुटआउटमा धेकलिएको थियो । टाइब्रेकरमा पनि ५/५ पेनाल्टी बराबर भएपछि सडन डेथमार्फ विजेता निर्धारण गर्नुपरेको थियो । फिफा रेफ्री लव खत्रीले सहाराका गोलकिपर लिगल, विकास गुरुङ, नाम्गेल, विष्णु गुरुङ, सन्तोष गुरुङ र राजन अधिकारी तथा पुलिसका राकेश श्रेष्ठलाई पहेलो कार्डको दर्शक गराएका थिए । दिपेन्द्र पौडेलको लामो क्रसलाई जुमानु र्राईले विपक्षी गोलकिपर सुमन लिगलको गल्तीमा गोलमा परिणत गर्दै पुलिसलाई छोटो समयको लागि भएपनि अग्रता दिलाएका थिए । जुमानुका ड्रप हेड लिगलको अगाडि ठोकिएर सहजै गोलमा परिणत भएको थियो । तर अनुभवी पुलिसको अग्रतालाई तत्काल बराबरी ल्याउने क्रममा सहाराका लागि म्यान अफ दि म्याच विष्णु केसीले १४ औं मिनेटमा गोल फर्काए । करीव ३० यार्डको दुरीबाट विष्णुले प्रहार गरेको कडा सट पुलिस गोलकिपर रितेशलाई चालै नदिई सिधै जालीमा सर्म्पर्कमा पुगेपछि खेल बराबरीमा आएको थियो । प्रतियोगितामा विष्णुको यो तेस्रो गोल हो । उच्च गोलकर्ताको दौडमा उनीसँगै शसस्त्र प्रहरी बलका गणेश लावतीले पनि र्सवाधिक तीन गोल गरेका छन् । विष्णुको गोलमा राम्ररी खुशी मनाउन नभ्याउँदै सहाराको युवा टोलीले अर्को खुशीको क्षण आत्मसात गर्‍यो । लगत्तै ४ मिनेटपछि सन्तोष गुरुङको क्रसमा राजकुमार घिसिङले विपक्षी पेनाल्टी बक्स भित्रबाट गोल गरेपछि सहाराले खेलमा अग्रता लियो । यसअघि नै विपक्षी गोलकिपर लडेको बेला तेज परियारले पेनाल्टी बक्स भित्रबाट हानेको कडा सट बाहिरिदाँ सहारा १३ औं मिनेटमै खेल बराबरी ल्याउनमा चुकेको थियो । पुन २४ औं मिनेटमा घिसिङको पासमा परियारले विपक्षी गोलकिपर रितेश अगाडि बढेको मौकामा चिप गरेको बल पोष्टभन्दा थोरै माथिबाट बाहिरिदाँ टोली पहिलो हाफमै जित पक्का गर्ने सुनौलो अवसरबाट चुकेको थियो । उता पुलिसका अनन्त थापा र चेतन घिमिरेले पहिलो हाफमा पाएका एक एक अवसर खेर जादा सहाराले मध्यान्तरसम्म २-१ को अग्रता कायम राख्यो । राकेश श्रेष्ठले ओभर ल्यापमा आएर क्रस गरेको बलमा अनन्त थापाको हेडले सही दिशा लिन नसकेको तीन मिनेट नवित्दै २९ औं मिनेटमा पर्वत पाण्डेको प्रिmकिकमा चेतन घिमिरेले गरेको प्रहार पनि सफल भएन् । दोस्रो हाफको अधिकांश समय सहारालाई निरन्तर दवाव दिएको पुलिसका लागि ४८ औं मिनेटमा अनन्त फेरी बराबरी गोलगर्नबाट चुके । विपक्षी पेनाल्टी बक्सभित्र कर्नरबाट आएको बल छातीले नियन्त्रणमा लिएपनि अनन्तले पोष्टमा प्रहार गर्न सकेनन् । तर त्यसको पाँचमिनेट नवित्दै कप्तान रमेश बुढाथोकीले गोल गरेपछि पुलिसले खेल बराबरीमा ल्याएको थियो । जुमानुले गरेको सनसनीपूर्ण क्रसलाई रमेशले विपक्षी पेनाल्टीबक्सभित्रबाट गोलमा परिणत गरेका थिए । अस्वस्थ्यताका बावजुद पुरै दुइ घण्टा मैदानमा विताएका भोला सिलवालका लागि बुधबारको खेल विर्सन योग्य रहृयो । तीन वटा राम्रा अवसरमा बल बाहिर फ्याँकेका भेलाले जुमानुको हेडपासलाई गोलको दिशा दिन नसक्दा पुलिस ६० औं मिनेटमा नतिजा आफनो पक्षमा पार्नबाट बञ्चित बनेको थियो । यसैगरी बुधबारका अर्का अभागी खेलाडी अनन्त मध्यान्तरपछि दुइवटा अरु राम्रा अवसरमा चुके । अतिरिक्त समयमा अनन्तको शसक्त एउटा हेडबल बाहिर फालेर सहारालाई जोगाएका गोलकिपर लिगलले निर्धारित समयको ७३ औं मिनेटमा पनि अनन्तको ६ यार्डबाट प्रहार गरेको सटलाई बचाएका थिए । त्यस्तै अतिरिक्त समयमा राकेशले ओभरल्यापमा गएर एकल प्रयासमा ३० यार्डबाट प्रहार गरेको कडा बल बारमा लागेर बाहिरिएको थियो । सहाराका तर्फाट भने सन्तोष केसीलाई स्थानान्तरण गरेका अनिल गुरुङले दिएको पासमा सृजित सहज अवसर राजकुमार घिसिङलाई स्थानान्तरण गर्दै मैदान छिरेका राजन अधिकारीले ७० औं मिनेटमा खेर फालेका थिए भने समय सकिन ६ मिनेट बाँकी रहदँा सन्तोष गुरुङलको क्रसमा तेज परियारले गरेको हेड पोष्टभन्दा माथि बाहिरिएको थियो । पराजयका बावजुद सहारा प्रशिक्षक किरण श्रेष्ठले सन्तुष्टि व्यक्त गर्दै सेमिफाइनल सम्मको यात्रालाई उपलब्धी मुलक बताए । उनले भने-'यहाँसम्म आइपुग्नु नै हाम्रा लागि ठुलो कुराहो त्यसमाथि पुलिस जस्तो टिमलाई टाइब्रकेरसम्म पुर्‍याउनु एउटा साहसको कथा नै हो । तथापि घिसिङ सन्तोष केसी र नाम्गेल जस्ता उच्च प्रदर्शन गरिरहेका खेलाडीहरु घाइते भएर मैदान छोड्नुपर्दा हामी जित्ने सम्भावनाबाट टाढियौं ।' दुइघण्टासम्म एकनासले भिडेर खेल्दा फिटनेसमा कमजोरीका कारण सहाराका सवैजसो खेलाडीहरु पटक पटक मांशपेशी तन्किएर मैदानमा ढलिरहेका थिए । उता पुलिस प्रशिक्षक विराटकृष्ण श्रेष्ठले आफनो खेलाडीले विपक्षीलाई कमजोर आक्दाँ अनाबश्यक दवाव खेप्नु परेको बताए । 'केटाहरुले विपक्षीलाई निकै कमजोर आँके त्यसको फल भोग्नुपर्‍यो । कुनैपनि बेला केटाहरुले विपक्षीबक्समा आत्मविश्वास प्रदर्शन गर्न सकेनन् । समयमै थप गोल गर्न नसक्दा उल्टो दवाव भोग्नुपर्‍यो ।' लिग विजेता तथा प्रसिडेण्ट्स कपको उपविजेता हुनुको लाज निकै कठिनता पूर्वक जोगाएका श्रेष्ठले भने । आहा गोल्डकपको गतवर्षसम्पन्न पाँचौ सस्करणमा सहभागिता नजनाएको पुलिस बाँकी सवै सस्करणको फाइनल पुगेको छ । आज दोस्रो सेमिफाइनलमा सहारा युकेले सशस्त्र प्रहरीबलको एपीएफसँग खेल्ने छ ।