पेट्रोलियम पदार्थको मूल्यमा भारी वृद्धि, विरोधमा विहानैदेखि प्रदर्शन

नेपाल आयल निगमले मंगलबारबाट लागु हुने गरी पेट्रोलियम पदार्थमा भारी मूल्यवृद्धि गरेको छ। अन्तर्राष्ट्रिय बजारमा मूल्इ बढेको भन्दै निगमले पुनः डिजेल, मट्टीतेल र एलपी ग्यासमा मूल्यवृद्धि गरेको हो । मूल्यवृद्धिपछि मट्टीतेलको बजार मूल्य प्रतिलिटर ६१ रुपैयाँ, डिजेलको प्रतिलिटर ६१ रुपैयाँ ३९ पैसा र खाना पकाउने एलपी ग्यासको प्रतिसिलिण्डर १२ सय ५० रुपैयाँ पुगेको छ।यसअघि डिजेलको प्रतिलिटर ५६ रुपैयाँ २५ पैसा, मट्टीतेलको प्रतिलिटर ५१ रुपैयाँ २० पैसा र एलपी ग्यासको प्रतिसिलिण्डर एक हजार एक सय रुपैयाँ कायम थियो ।मूल्यवृद्धिपछि काठमाडौ उपत्यका बाहिर मट्टीतेल र डिजेलको बजार मूल्य न्युनतम ६० देखि अधिकतम ६२ रुपैयाँ ५० पैसासम्म पर्ने बताइएको छ।यता सरकारले तेलको भाउ वढाएको विरोधमा विद्यार्थीहरुले आज विहानैदेखि राजधानीमा प्रदर्शन गरिरहेका छन् । चुनावको मुखैमा आएर सरकारले हिजो डिजेल, मट्टीतेल र खाना पकाउने ग्यासमा मुल्यवृद्धि गरेपछि विद्यार्थीहरु सडकमा ओर्लीएका हुन् । विद्यार्थीहरुको समुहले प्रदर्शनीमार्ग, ठमेल, चावहिल लगायतका स्थानमा विरोध प्रदर्शन गरिरहेका छन् । उनीहरुले आज देशभर विरोध प्रदर्शन गर्ने जनाएका छन् । विरोध प्रदर्शनका कारण यातायात ब्यवस्था केही प्रभावित भएको छ ।