बिरगंज सभामा बम बिष्फोट

सात दलको सभा भइरहेकै बेला बिरगंज सभास्थल बाहिर १२ जना घाइते हुनेगरी बम बिष्फोट भएको छ । 
बिरगंजमा सात दलको सभा भइरहेको बेला सभास्थल बाहिर बम बिष्फोट हुँदा १२ जना घाइते भएका छन् । घाइतेहरुलाई बमको छर्रा लागेको र उनीहरुको अवस्था गम्भीर नभएको बताइएको छ । उपचारका लागि घाइतेहरुलाई स्थानीय अस्पतालमा लगिएको छ । सभा सकिनु केही अघि अन्तिम वक्ता नेपाली कांग्रेस नेता तथा मन्त्री र्फमुल्ला मन्सुरले बोलिरहेको बेला दिउँसो ३ बजेर ५५ मिनेटमा बम बिष्फोट भएको थियो । रंगशाला बाहिर मोटर पार्किङ गरिएको ठाउँमा बम बिष्फोट गराइएकोले घाइते हुनेमा सभाबाट फर्कदै गरेका मानिसहरु छन् । ठूलो आवाजमा बम बिष्फोट भएपछि सभामा भागदौड मच्चिएको थियो ।
ज्वालासिंहलगायत चार सशस्त्र समूहले सभामा सहभागी नहुन चेतावनि दिएका कारण सात दलको सभामा कम सहभागिता हुने अनुमानबिपरीत बिरगंजको सभामा ठूलो संख्यामा मानिसहरु सहभागी भएका थिए । नेपाली कांग्रेसका मन्सुर, एमालेका भरतमोहन अधिकारी, माओवादीका बर्षामान पुन अनन्त, सदभावना आनन्दीदेवीकी सरिता गिरी, जनमोर्चाका घनश्याम शर्मा पौडेल, नेमकिपाका सुनिल प्रजातपती, बाममोर्चाका सिपी मैनालीले सभालाई सम्बोधन गर्दै सबैलाई संविधानसभा चुनावमा भाग लिन आह्वान गरेका थिए । उनीहरुले अब संविधानसभा चुनाव कुनै हालतमा नसार्ने पनि सभामा प्रतिवद्धता ब्यक्त गरेका थिए ।