गाविसको सङ्ख्याभन्दा सचिवको सङ्ख्या बढी

खजुरा (बाँके), माघ ३ गते । 'कहीँ भने मरिमरी कहीँ भने परिपरी' भन्ने उखान बाँके जिल्लाको गाविस सचिवहरूका सर्न्दर्भमा सही सावित भएको छ । जिल्लामा ४६ गाविस भए पनि गाविससचिवहरूको सङ्ख्या ६१ रहेका र ती सबैलाई तलब खुवाउन बाँके जिल्ला विकास समिति बाध्य देखिएको छ । जिल्लाबाट गत भदौ महिनामै अन्य जिल्लामा सरुवा भएका १५ गाविस सचिव आफ्नो कार्यक्षेत्रमा नगएपछि यस्तो स्थिति सिर्जना भएको हो । उनीहरूले अहिले हाजिर गरेर बसीबसी तलब बुझने गरेका छन् । सरुवा भएका गाविस सचिवहरू सम्बन्धित कार्यक्षेत्रमा नगएका कारण सरुवा भई आएका सचिवहरूले पनि आफ्ना ठाउँमा राम्ररी काम गर्न पाएका छैनन् भने राजनीतिक हस्तक्षेपका कारण जिल्ला विकास समिति निरीह बन्न पुगेको छ । सबै गाविसमा सचिव पुर्‍याउनुपर्ने जिम्मेवारी बोकेको स्थानीय विकास मन्त्रालयले नै सरुवा भएका गाविस सचिवहरूलाई रवाना नदिनु भनेर पत्र पठाएकाले जिल्ला विकास समिति केही गर्नसक्ने अवस्थामा नभएको थाहा भएको छ । गाविस सचिवहरू राजनीतिक नेताहरूमार्फत आफ्नो सरुवा थमौती गराउने कसरतमा लागेको बाँके जिल्ला विकास समितिले जनाएको छ । स्थानीय विकास अधिकारी नरहरि बरालले सरुवा भएका सचिवहरू आफ्नो कार्यक्षेत्रमा नगएकोबारे मन्त्रालयलाई जानकारी दिएको तर उतैबाट रवाना नदिनू भनेको बताउँदै गाविस सङ्ख्याभन्दा गाविस सचिवको सङ्ख्या बढी भएका कारण उनीहरूलाई तलब खुवाउन पनि समस्या भएको गुनासो गर्नुभयो । जिल्लाका ती १५ गाविस सचिवहरू बर्दिया, सल्यान, दाङ, कास्की र स्याङ्जालगायतका जिल्लामा सरुवा भएको थाहा भएको छ ।