हिमपातका कारण मुलुकभरको जनजीवन प्रभावित

गत सातायता मुलुकभर भएको हिमपातका कारण जनजीवन प्रभावित भएको छ। सुदूरपश्चिमी भेगका अधिकांश जिल्लामा हिमपात भएको छ।
बैतडी,डढेल्धुरा,सिमिकोट, डोटीलगायतका स्थानमा परेको बाक्लो हिउँका कारण जनजीवन कष्टकर भएको बताइएको छ। गत बिहीबार साँझबाट ति स्थानमा अत्याधिक हिमपात भइरहेको छ।
बैतडी-डढेल्धुरा दशरथचन्द्र राजमार्गमा हिउँ परेकाले यातायात चलेका छैनन् । यातायात अवरुद्ध हुँदा पहाडी जिल्लाहरुमा खाद्यान्न ढुवानी गर्न सकिएको छैन । अवरुद्ध राजमार्ग खुलाउन प्रहरी तथा नेपाली सेना प्रयासरत रहेका छन् ।
डोटीमा राजमार्ग अवरुद्ध भई सडकमा रोकिएका सवारी साधन हिउँले ढाकेको बताइएको छ।
धादिङ जिल्लाको दक्षिणी सिमानामा पर्ने मकवानपुर जिल्लाको त्रिभुवन राजपथको दामन सिमभञ्ज्याङ्ग सडकखण्डमा शनिबार साँझ हिउँ परेपछि जाडोले जनजीवन प्रभावित भएको छ । त्रिभुवन राजपथको अघोरदेखि पालुङ सडकखण्डसम्ममा हिउँ परेपनि राजपथ भने अवरुद्ध भएको छैन ।
सिमभञ्ज्याङ्गका सुमन सुवेदीले डाँडाभरि जताततै हिउँ जमेको भएपनि यातायात सुचारु रहेको बताउनुभयो । विगतका वर्षहरुमा हिउँ परेपछि यातायात अवरुद्ध हुने गरेको थियो । यातयात रोकिएपछि काठमाडौंबाट गएकाहरु दामनमा र हेटौंडाबाट गएकाहरु अघोरमै रहनुपथ्र्यो ।
शनिबार राति थप हिउँ नपरेपछि यातायात सुचारु रहँदा पर्यटकहरुले अघोरदेखि टिस्टुङसम्म हिउँ खेल्न पाउने छन्।
दामनमा हिउँ परेपछि ७८ किमि टाढा रहेको काठमाडौं र ५८ किमि यता रहेको हेटौंडाबाट पनि मानिसहरु हिउँ खेल्न पुग्छन् । दामनको हिउँ खेल्न वीरगंज, नवलपरासी,धादिङ ,नुवाकोट र चितवनबाट पनि मानिसहरु जानेगर्दछन। हिमपातले जनजीवन अत्यधिक प्रभावित भएपनि आर्थिक कारोबार हिउँ परेकै बेला आउने आन्तरिक पर्यटकहरुको कारण बढी हुने भएकोले दामन र सिमभञ्ज्याङ्गका होटलहरु चिसोको कुनै परवाहनै नगरी अहिले पर्यटकको सेवामा तल्लिन रहेका छन् ।
तीनदेखि लगातार परेको हिमपातका कारण सुदूरपश्चिमको पहाडी जिल्लाको जनजीवन कष्टकार बनेको छ । हिमपातका कारण पहाडी जिल्लामा तीनदेखि ठप्प भएको यातायात सेवा शनिबार साँझदेखि आंशिक रुपमा संचालन भएको छ ।
सुरक्षाकर्मीहरुले भीमदत्त राजमार्गमा पर्ने हगुल्टे र गैरा सडकखण्डको हिउँ पन्छाएपछि यातायात सेवा आंशिक रुपमा संचालन हुन सकेको हो । उक्त सडकखण्डको हिमपातको अवरोध हटाउन कैलालीको गोदावरीस्थित सडक डिभिजन कार्यालयबाट डोजर समेत त्यसतर्फ पठाईएको सेती अञ्चल प्रहरी कार्यालय धनगढीले जनाएको छ ।
जल तथा मौसम विज्ञान विभागकाअनुसार आइतबार उच्च पहाडी भेगमा हिमपात हुनेछ । विभागले चिसोसँगै फैलिएको शितलहरका कारण हवाई सेवा स्थगित गरिएका छन् । काठमाडौ उपत्यकामा समेत तीन दिनयता निकै चिसो महशुस गरिएको छ। उपत्यकाको आइतबार बिहानको तापक्रम ४ डिग्री सेल्सियस मापन गरिएको विभागले जनाएको छ।