तीन प्रहरी चौकी लुटिए

खोटाङमा हतियारधारी समूहले तीन प्रहरी चौकी लुटेको छ तथा लुटेराहरुको अझै पहिचान हुन सकेको छैन। 
माघ ७ गते राती र ८ गते बिहान खोटाङ जिल्लाका तीन प्रहरी चौकी लुट्ने समूहको अझै पहिचान भइनसकेको प्रहरीले बताएको छ । खोटाङ जिल्ला प्रहरी कार्यलयका प्रहरी निरिक्षक शम्भु बरालका अनुसार, प्रहरी चौकि लुटिएका हुक्नाचौर, चिसापानी र देविथानमा घटनाको अनुसन्धानका लागि जनपद र सशस्त्र प्रहरी पुगेका छन् । सप्तरीको बरमझियामा रहेको सशस्त्र प्रहरी क्याम्पबाट दिउँसो हेलिकप्टरबाट सशस्त्र प्रहरीलाई घटनास्थलहरुमा झारिएको छ । घटनास्थलहरुको नजिकका जिल्लाहरु भोजपुर र उदयपुरमा पनि नाकाबन्दीका लागि प्रहरी परिचालन गरिएको प्रहरीले बताएको छ ।
खोटाङको दक्षिणी भेकको हुक्नाचौरमा ७ गते बेलुका ६ बजे नै प्रहरी चौकी लुटिएको थियो । प्रहरीका अनुसार, पहिले दुई जना मानिस गाउँमा झगडा भएको रिपोर्ट लेखाउन आएका थिए । उनीहरुसँग कुरा हुँदैगर्दा २५ जना जति हतियारधारी मानिसहरुले एक्कासी सेन्ट्री र अरु प्रहरीलाई नियन्त्रणमा लिएका थिए । त्यसपछि उनीहरुले सबै प्रहरीलाई बाँधेर त्यहाँ रहेको ३ थ्रि नट थ्रि राइफल, एउटा पेस्तोल र गोलीहरु लुटेर हिडेका थिए । प्रहरी निरिक्षक बरालका अनुसार, त्यहाँ आक्रमण गर्न आउने समूहसँग कटुवा पेस्तोल तथा सामान्य हतियार मात्र थिए ।
राती साँढे एक बजे चिसापानी चौकीमा आक्रमणकारीले एसएमजी र एलएमजीबाट फायर खोलेको प्रहरी निरिक्षक बराल बताउछन् । उनका अनुसार, दुवैतर्फबाट पौने एक घण्टा जति गोली हानाहान भएको थियो । त्यसपछि अर्सइको नेतृत्वमा रहेको प्रहरी शक्ति पराजित भएको थियो र हतियारधारीहरुले ४ थ्रि नट थ्रि राइफल र त्यसका गोली लुटेर लगेका थिए । त्यो आक्रमणमा ५० भन्दा धेरै हतियारधारी संलग्न रहेको प्रहरी बताउछ ।
देविथानमा रहेको प्रहरी चौकीमा बिहान पाँच बजे आक्रमण भएको थियो । त्यहाँ प्रहरीसँग हतियार नभएकाले हतियारधारीहरुले प्रहरीलाई बाँधेर कुटपिट गरी हिडेका थिए ।
आक्रमणमा संलग्न समूहको स्पष्ट पहिचान नभइसके पनि उनीहरु मंगोल अनुहारका भएको प्रहरीको भनाइ छ । स्थानीय बासिन्दाहरु भने आक्रमणकारीहरु 'किरात जनशक्ति पार्टीका कार्यकर्ता भएको बताउँछन् । किराँत जनशक्ति पार्टी किराँत वर्कस पार्टीबाट फुटेको संगठन हो । गोपाल खम्बुले आफ्नो नेतृत्वमा रहेको किराँत वर्कस पार्टीलाई माओवादीमा मिलाएपछि असन्तुष्टहरुले किराँत जनशक्ति पार्टी गठन गरेको जानकारहरु बताउछन् । गोपाल अहिले माओवादीको केन्द्रीय सदस्य छन् ।
प्रहरीका अनुसार, हुक्नाचौर चौकीमा आक्रमण गर्नेहरुले 'हामीलाई तिमिहरुले भोली चिन्छौ, संविधानसभा चुनाव कुनै हालतमा हुन दिन्नौ भनेका थिए ।'