श्यामसुन्दर गुप्ताले एक अरब २६ करोड भ्रष्टाचार

उद्योग वाणिज्य तथा आपूर्तिमन्त्री श्यामसुन्दर गुप्ताले साल्ट ट्रेडिङ कर्पोरेसनभित्र एक अरब २६ करोडको भ्रष्टाचार भएको खुलासा गर्नुभएको छ । रिपोर्टर्स क्लब नेपाल लुम्बिनी अञ्चल शाखाद्वारा आयोजित साक्षात्कार कार्यक्रममा बोल्दै उहांले कर्पोरेसन संचालन समितिका वर्तमान अध्यक्षदेखि पूर्वमहाप्रबन्धक समेतको मिलेमतोमा भ्रष्टाचार भएकाले छिट्टै कारबाही प्रक्रिया अगाडि बढाइने बताउनुभयो । भारतबाट नुन आयात गर्दा ढुवानीबापत प्रतिकेजी चार रुपैयां लाग्नेमा ११ रुपैयां देखाई भ्रष्टाचार भएको उहांको खुलासा थियो । चिनी आयातका क्रममा डेढ करोड भ्रष्टाचार भएको प्रमाण पाइएको बताउनुभयो । भ्रष्टाचारमा संचालक समितिका अध्यक्ष लक्ष्मीदास मानन्धरका अलावा राजेन्द्रमान शेरचन प्रत्यक्ष संलग्न भएको उहांको भनाइ थियो। मन्त्री गुप्ताले भ्रष्टाचारको खुलासा हुने भएकाले आफूविरुद्ध साल्ट टेड्रिङ कर्पोरेसनका उच्च अधिकारीहरुले रकम खर्च गराएको आरोप लगाउनुभयो । उहांले भन्नुभयो,'साल्ट टे्रडिङका पूर्व महाप्रवन्धक चन्द्रशेखर सिंहमार्फत आनन्दीदेवी सिंहका भाइ सुरेन्द्रकुमार सिंहलाई ४० लाख पठाइएको प्रमाण भेटेको छु ।' सुरेन्द्रकुमार सिंहले रकम पाएपछि आनन्दीदेवी सिंहलाई आफूविरुद्ध उक्साएको आरोप लगाउनुभयो। नेपाल सदभावना पार्टी आनन्दीदेवीका बहुमत केन्द्रीय सदस्य आफ्नो पक्षमा भएकाले आफू वरिष्ठ उपाध्यक्षका रुपमा कायम रहने बताउनुभयो। पार्टीको बहुमत सदस्यको निर्णयबमोजिम आफू सात दलको बैठकमा शीर्ष नेताका रुपमा सहभागी भएको बताउनुभयो। पार्टीको बहुमत सदस्यले नहट भनेसम्म आफू मन्त्री पदबाट पनि नहट्ने स्पष्ट पार्नुभयो। डिजेल, मट्टीतेल र एलपी ग्यासको मूल्यवृद्धि बाध्यतात्मक भएको बताउनुभयो। अन्तर्राष्ट्रिय बजारमा मूल्यवृद्धि भएकाले आयल निगम मासिक ६० करोड घाटा बेहोर्न बाध्य भएपछि मूल्यवृद्धि गरिएको बताउनुभयो। मूल्यवृद्धिपछि पनि मासिक २३ करोड घाटा कायमै रहेको जानकारी गराउनुभयो। इन्डियन आयल कर्पोरेसनलाई तिर्न बांकीमध्ये एक अरब रुपैयां हिजो पठाइएको खुलासा गर्नुभयो। बांकी रकम बिस्तारै तिरिने गरी नीति बनाइएको बताउनुभयो। अन्तर्राष्ट्रिय बजारमा एक महिनापछि मूल्य घट्ने जानकारी पाएको बताउदै एक महिनापछि मूल्य घट्नसक्ने जानकारी दिनुभयो। मूल्यवृद्धिले आम जनतामा मार परेकाले आफू दुखी भएको बताउदै त्यसको विरोध नगर्न आग्रह गर्नुभयो। सरकार चैतमा संविधानसभा निर्वाचन सफलताका साथ सम्पन्न गर्न दृढ रहेकाले चुनाव हुने बताउनुभयो। मधेसका आन्दोलनरत सबै पक्षलाई वार्तामार्फत् चुनावमा सहभागी हुन आग्रह गरिने बताउनुभयो। आफूले जनतान्त्रिक तराई मुक्तिमोर्चा गोइत पक्षका अध्यक्ष जयकृष्ण गोइतसंग हालै टेलिफोनमा कुराकानी गरेको खुलासा गर्नुभयो।