सांस्कृतिक राजतन्त्र चाहिन्छ: सुजाता कोईराला

विना विभागीय मन्त्री सुजाता कोईरालाले नेपालमा सांस्कृतिक राजतन्त्रको आवश्यकता रहेको बताएकी छिन्।
उनका अनुसार यो उनको व्यक्तिगत भनाइ हो।
राजतन्त्रको पक्षमा वकालत गरेको भनी मन्त्री कोइराला पटक पटक विवादमा परेकी छिन।
कोईरालाले भनिन, “अन्तरिम संविधानमा गणतन्त्रको उल्लेख गरीसकिएकाले राजतन्त्र र गणतन्त्रको बहस अन्त्य भइसकेको छ।"
आफु संविधानको विपरित जान नसक्ने पनि उनले बताइन्।
तर उनले भनिन्, “विविधताले भरिएको नेपालको राष्ट्रिय एकता र विशिष्ट परिचय कायम राख्न सांस्कृतिक राजतन्त्र भएपनि राख्नु पर्छ भन्ने मेरो व्यक्तिगत मान्यता अझैपनि यथावत छ।"
बीबीसी नेपाली सेवा र बीबीसी वर्ल्ड सर्भिस ट्रष्टद्वारा आयोजित साझा सवाल कार्यक्रममा बोल्दै मन्त्री कोईरालाले आफ्नो व्यक्तिगत धारणा राख्न आफु स्वतन्त्र भएको बताएकी थिइन्।
आलोचकहरुले कोईरालाको मन्त्रीमा नियुक्तिलाई राजतन्त्र जोगाउन उनको दल नेपाली काँग्रेसद्वारा गरिएको प्रयासको रुपमा हेरेकाछन्।
खण्डन
मन्त्री कोइरालाले सो आरोपको खण्डन गरिन्।
नेपाली काँग्रेसले संविधानसभा चुनावको आफ्नो घोषणापत्रमा गणतन्त्रमा जाने उल्लेख गर्ने निर्णय भइसकेको उनले बताइन्।
तर मन्त्री कोइरालाले भनिन, “नेतृत्वमा जाने मानिसले देशलाई निकास दिन सबै विकल्पहरु खुल्ला राख्नु पर्छ।“
अन्तरिम संविधानमा हालै गरिएको संशोधन अनुसार चैतका लागि प्रस्तावित संविधानसभा चुनावको पहिलो बैठकले गणतन्त्रको कार्यान्वयन गर्नेछ।
नेपाल गणतन्त्रात्मक देश हुने निर्णय चाहिं अन्तरिम संविधानमा गरिसकिएको छ।
कमजोर सुरक्षा स्थितिका कारण चुनाव अझै अनिश्चित रहेको ठानिएकाले विभिन्न विकल्पहरुका बारे राजनीतिक क्षेत्रमा अडकलबाजीहरु भइरहेका छन्।