मैना सुनुवारको बारेमा चलचित्र बन्ने

२५ जनवरी, ०८ । माओवादी जनयुद्धको क्रममा सेनाबाट मारिएकी मैना सुनुवारको बारेमा चलचित्र बन्ने भएको छ । निर्देशक/ निर्माता के.पी पाठकले सुनुवारको वियोगान्त कथामा आधारित चलचित्र निर्माण गर्ने भएका छन् । आज राजधानीमा एक पत्रकार सम्मलेनको आयोजना गरेर स्वर्गीय मैना सुनुवारको बारेमा चलचित्र निर्माण गर्ने घोषणा गरेका हुन् । सहित्यकार तथा लेखक नयनराज पाण्डेको लेखन, रामेश श्रेष्ठको संगीत तथा केपी पाठकको निर्माण/ निर्देशनमा निर्माण हुन लागेको उक्त चलचित्रको मुख्य पात्र मैनाको भूमिकामा ईमाडोल ललितपुरकी १८ बर्षिया अनिता केसीले अभिनय गर्ने भएकी छिन् । मैनाको रहनसहन, तस्वीर, रुप र व्यवहारबारे परिवारसंग सम्पर्क गरी अध्ययन गरेपश्चात् केसीलाई छनोट गरिएको हो । पाठकले बताएअनुसार चलचित्रका अन्य पात्र यथार्थमा आधारित रहनेछन् । उनले चलचित्रमा गैरव्यवसायिक कलाकारलाई मात्र लिईने र पात्रहरुको खोजी कार्य भईरहेको जानकारी गराए ।मैनाका बाबु पूर्ण सुनुवारले आफ्नी छोरीको हत्या गर्नेहरुलाई दण्ड दिन दबाब सृजना गर्न चलचित्रले योगदान दिने विश्वास गर्नुभयो । मैनाको जस्तो वियोग अरुले भोग्न नपरोस् भन्दै चलचित्र र निर्देशक केपी पाठकको अभियानको सफलताको कामना गर्नुभयो । संगीतकार रामेशले आफूहरुले 'बलिदान' पछि मैना सुनुवारको बारेमा यथार्थवादी चलचित्र निर्माण गर्न लागेको बताउदै हत्याका अपराधीहरुले जनआन्दोलन २ पछि पनि सजाय नपाएकामा असन्तुष्टि पोख्नुभयो । उहांले पीडितले कुनै राहत नपाएको उल्लेख गर्दै नेपालमा लोकतन्त्र नै नआएको बताउनुभयो । कार्यक्रममा संचारकर्मी रमण घिमीरेले 'मैना' चलचित्रको सफलताको कामना गर्दै यस्तो सत्य घटनामा चलचित्र निर्माण गर्नु नेपाली चलचित्र क्षेत्रका लागि गर्वको बिषय हो भन्नु भयो । 'मैना' चलचित्रको आगामी फागुन महिनाबाट छायाङ्कन शुरु हुदैछ