जनकपुरमा सातदलको संयुक्त सभा सम्पन्न

२६ जनवरी, ०८ । विरोध र झडपकावीच सात राजनीतिक दलले आज पाँचौ संयुक्त सभा जनकपुरमा सम्पन्न गरेका छन ।१२ गते १२ वजे वाह्रविगाहा मैदानमा जाउँ भन्ने नाराका साथ प्रचार गरिएको भएपनि तीनदिन देखि जारी वन्दका कारण अपेक्षा गरेअनुरुप सहभागिता हुन सकेन । वाह्रवजे हुने भनिएको सभापनि अपरान्ह दुईवजेमात्र शुरु भई करिव डेढघण्टा मात्र चलेको थियो । सभालाई संवोधन गर्दै जनमोर्चा नेपालका अध्यक्ष अमिक शेरचनले २३८ वर्षदेखि जारी मधेशी माथिको थिचोमिचोको अन्त्य संविधानसभाको चुनावमार्फत हुने भएकाले यसमा साथ दिन आग्रह गर्नुभएको थियो । सात राजनीतिक दलले जनकपुरमा आयोजना गरिरहेको संयुक्त सभालाई प्रमुख अतिथिको आसनवाट वोल्दै शेरचनले इतिहासमै पहिलोपल्ट जनताको सहभागितामा संविधान लेखिन लागेको भन्दै एकजुट भएर चुनावमा सहभागी हुन आह्वान गर्नुभयो । आजको उपस्थितिले मधेशका जनता चुनाव चाहान्छन भन्ने पुष्टि भएको भन्दै शेरचनले चुनावले कसैलाई काखा र कसैलाइ पाखा नगर्ने स्पष्ट पार्नुभयो । सभालाइ संवोधन गर्दै नेपाली कांग्रेसका उपसभापति रामचन्द्र पौडयालले मधेशका जनताका सवै माग पुरा भईसकेको र तिनलाइ लागुगर्न मात्र वाँकी रहेको वताउनुभयो । मधेशले पाएका उपलब्धीलाई संस्थागत गर्न पनि संविधानसभाको चुनाव अपरिहार्य भएको उहाँको भनाइ थियो । संविधानसभापछि मुलुकका सवै नागरिकको आफ्नै शासन र प्रशासन हुने भन्दै पौडेलले मधेशीको सो चाहना पनि पुरा हुने दावी गर्नुभयो । सरकारले स्वायत्त मधेशको प्रतिवद्धता जनाईसकेको, शहिद परिवारलाइ राहत दिईसकेको, केही घाइतेलाई दिल्लीमा उपचार गराईरहेको र नागरिकता समस्या समेत समाधान भएको भन्दै पौडेलले अन्य अधिकारका लगि चुनाव जरुरी रहेको दोहोराउनुभयो । तराइ मधेश लोकतान्त्रिक पार्टीतर्फ इंगित गर्दै शान्तिमन्त्री समेत रहेका पौडेलले भन्नुभयो- पहिले वार्ता गर्छौ भन्ने अनि सरकारले पत्र पठाएपछि वार्ताको अर्थ छैन भन्ने यो कस्तो चाला हो ?नेकपा एमालेका केन्द्रीय सदस्य रामचन्द्र झाले वन्दका वावजुद भएको उपस्थितिलाइ उत्साहजनक भएको प्रतिक्रिया दिनुभयो । नेपाली जनताको २००७ सालदेखिकै सपना संविधानसभाको चुनाव गर्नु रहेको भन्दै झाले चुनाव हुन नसके २३८ वर्षदेखि भारी वनेको राजतन्त्र नेपालीको शिरमा थोपरिने चेतावनी दिनुभयो । दोश्रो जनआन्दोलनका वाचा पुरा गर्न पनि संविधानसभाको चुनाव आबश्यक भन्दै झाले सवै मधेशी जनतालाई अधिकार सुनिश्चीत गर्न चुनावमा सहभागी हुन आग्रह गर्नुभयो । चुनाव पहिलेनै सम्पूर्ण मेधश एक प्रदेशको माग गर्नेहरुलाइ चेतावनी दिंदै झाले त्यस्तो गम्भीर विषयको निर्णय संविधानसभाको चुनाववाटै हुनुपर्ने वताउनुभयो । नेकपा माओवादीका केन्द्रीय सदस्य मातृका यादवले मधेशको अधिकारका लागि भनेर आन्दोलन गरेका दलहरुले मधेशी शहिदको भावना वुझ्न नसकेको आरोप लगाउनुभयो । संविधानसभाको चुनाव भाँडन मधेशका सामन्त, प्रतिगामी र दरवारियाहरु लागिपरेको भन्दै यादवले मधेशी जनतालाई सचेत हुन आग्रह गर्नुभयो । संविधानसभाको चुनाव मार्फतनै नयाँ नेपालको उदय हुने भन्दै यादवले सवै दललाइ एकजुट भएर चुनावमा लाग्न आह्वान गर्नुभयो । आन्दोलनरत दलहरुले हाम्रो सभामा रोक लगाएका छन्- आक्रोशित मुद्रामा यादवले भन्नुभयो- हामीले उनीहरुका कार्यक्रममा रोक लगायौ भने के हुन्छ ? मधेशको नाममा आन्दोलन गरेका भए उनीहरु पाईलामा पाईला मिलाएर चुनावमा होमिनुपर्ने यादलको भनाइ थियो । नेपाल सदभावना पार्टी आनन्दीदेवी नेतृ सरिता गिरीले अन्य नेपालीका लागि भन्दापनि मधेशीका लागि संविधानसभाको चुनाव जरुरी रहेको भन्दै सशस्त्र समुहलाइ पनि हतियार छोडी चुनावमा भाग लिन आग्रह गर्नुभयो । मधेशी नेता गजेन्द्रनारायण सिंहले मुलुक टुक्राउनका लागि नभई अधिकारका लागि आन्दोलन गर्नुपरेको भन्दै गिरीले अहिले राष्ट्रनै टुक्राउने कुरा आउनु जायज नभएको वताउनुभयो । २७ दिनको मधेश आन्दोलनले नेपाली शासकहरुलाई पाठ सिकाईसकेको भन्दै गिरीले मधेशीहरु सच्चा राष्ट्रवादी भएको दावी गर्नुभयो । सशस्त्र समुहसंग वार्ताका लागि आग्रह गर्दै गिरीले सवै मधेशीलाई चुनावमा भाग लिन आह्वान गर्नुभयो ।वाममोर्चाका अध्यक्ष सीपी मैनालीले जात र भाषाका मात्र कुरा गर्नेले मुक्ति दिन नसक्ने भन्दै सात दलको नेतृत्वमा हुने संविधानसभामा सहभागी हुन आग्रह गर्नुभयो । विपन्न समुदाय र महिलाको हित संविधानसभाको चुनाव मार्फत हुने भन्दै मैनालीले चुनावपछिनै शान्तिपूर्ण क्रान्ति हुने दावी गर्नुभयो । आफ्नो संक्षिप्त संवोधनमा मैनालीले मधेशी जनतालाइ चुनावमा सहभागी हुन आह्वान गर्नुभयो । सभा सकिन लाग्दा प्रदर्शनकारी र प्रहरीवीच झडप भएको थियो ।