फाप्लु बजारमा आगलागीबाट पाँच घर नष्ट, एक बालकको मृत्यु

मोरङ, पुस ६ गते । सोलुखुम्बु जिल्लाको सदरमुकाम सल्लेरीस्थित फाप्लु बजारमा शनिबार राति आगलागी हुँदा एक तीन वषीर्य बालकको मृत्यु हुनुका साथै एक सरकारी कार्यालयसहित पाँचवटा घर जलेर नष्ट भएका छन् । आगलागीमा परी स्थानीय निङ्गमा शर्ेपाका तीन वषीर्य छोरा तेन्जिङ शेर्पाको मृत्यु भएको र आगलागीबाट चार करोड रुपियाँ मूल्य बराबरको क्षति भएको पूर्व क्षेत्रीय प्रहरी कार्यालय विराटनगरले जनाएको छ । स्थानीय कर्म लामाको घरको चुल्होबाट सुरु भएको उक्त आगलागीबाट नजिकैको जिल्ला स्वास्थ्य कार्यालय रहेको नुरु शेर्पाको घर जलेर पूरै नष्ट हुँदा उक्त कार्यालयमा रहेको भौतिक सामग्री र औषधिसमेत नष्ट भई डेढ करोड रुपियाँ बराबरको क्षति भएको जनाइएको छ । आगलागीबाट स्थानीय कर्म लामा, निङ्गमा शेर्पाको घर पनि जलेर पूरै नष्ट भएको छ भने जिल्ला वन कार्यालय र नेपाल वायुसेवा निगमको कार्यालयमा पनि क्षति पुगेको छ । राति ११ बजे सुरु भएको उक्त आगलागी प्रहरी, सेना र स्थानीयवासीको सक्रियतामा राति साढे एक बजे नियन्त्रणमा आएको जनाइएको छ । यसैगरी, सशस्त्र प्रहरी प्रधान कार्यालयले दिएको जानकारी अनुसार धनुषा जिल्लाको ढल्केबर-५ स्थित ढल्केबर चोकमा शनिबार राति आगलागी हुँदा मखन साहको पसलमा क्षति पुगेको छ । सो आगलागीबाट करिब दर्ुइ लाख मूल्य बराबरको क्षति भएको छ ।