निर्वाचनसम्बन्धी संशोधनविधेयक पारित

व्यवस्थापिका संसद राज्य व्यवस्था समितिले निर्वाचनसम्बन्धी केही ऐन संशोधन गर्ने विधेयक २०६४ लाई संशोधनसहित पारित गरेको छ । समितिले निर्वाचन आयोगलाई थप अधिकारको प्रत्यायोजन गरिएका केही बुँदा हटाएर विधेयक पारित गरेको हो । यसअघि ऐनअन्तर्गत जारी भएका नियम, निर्देशिका, आदेशको कार्यान्वयन गर्दा कुनै बाधा आइपरेमा आयोगले आवश्यक आदेश जारी गरी बाधा अड्चन फुकाउन सक्ने व्यवस्था गरिएकोमा समितिले हटाएको छ । त्यसै गरी निर्वाचन आयोगले आफ्ना कर्मचारीहरुलाई अधिकार प्रत्यायोजन गर्न सक्ने व्यवस्था पनि विधेयकबाट हटाइएको छ । संशोधित विधेयकअनुसार आयोगले ऐन तथा ऐनअन्तर्गत बनेका नियमका सम्बन्धमा आवश्यक कार्यविधि बनाई लागू गर्न सकिने व्यवस्था थप गरिएको छ । समितिले पारित गरेको विधेयकलाई आज बस्ने संसद्को दोस्रो बैठकमा प्रस्तुत गरिने कार्यक्रम रहेको छ ।