टाइगर्सको ज्यान मार्ने धम्कीका कारण ५८ परिवार विस्थापित

धरान, २१ माघ । सुनसरी जिल्लाको हरिपुरबाट विस्थापित भई भरौल गाउँ विकास समितिको बाङ्गेबजारमा बस्दै आएका परिवारका बालबालिका सामाजिक सङ्घसंस्था, विद्यालय र क्लबको सहयोगमा विद्यालय भर्ना भएका छन् । तर्राईमा सशस्त्र आन्दोलनरत समूह मधेसी टाइगर्सको ज्यान मार्ने धम्कीका कारण चार महिनादेखि ५८ परिवार सो गाउँ विकास समितिमा विस्थापित जीवन बिताइरहेका छन् । ती परिवारका बालबालिकालाई भरौलकै स्थानीय मर्निङस्टार बोर्डिङ स्कुल र महेन्द्रनगर गाविसको वसन्तऋतु माध्यमिक विद्यालयमा भर्ना गरिएको विस्थापित समाजका सचिव कमल तामाङले जानकारी दिनुभयो । भर्ना गरिएका बालबालिकामध्ये नौजनालाई वसन्तऋतु माध्यमिक विद्यालयको माध्यमिक तहमा र ३४ जना मर्निङस्टार बोर्डिङ स्कुलको निम्नमाध्यामिक तहमा भर्ना गरिएको बताइएको छ । उनीहरूलाई विद्यालयमा निःशुल्क अध्ययन गर्ने व्यवस्था मिलाइएको पनि सचिव तामाङले बताउनुभयो ।