वीरगन्जमा विस्फोट गराउने चार पक्राउ

काठमाडौँ, (महानगर)। वीरगन्जको आमसभामा विस्फोट गराएको आशङ्कामा प्रहरीले गएराति चार जनालाई हतियारसहित पक्राउ गरेको छ।
बारा जिल्लाको मोरा गाविसमा पक्राउ पर्नेमा रमेश चौधरी, रामदास चौधरी र लखन चौधरीलगायत चार जना रहेका छन्। थुप्रै हातहतियारसहित पक्राउ परेका उनीहरूका बारे प्रहरीले व्यापक अनुसन्धान गरिरहेको जनाएको छ।
वीरगन्ज सभामा विस्फोट गराउने तथा हत्या र लुटपाटमा पनि उनीहरू संलग्न रहेको प्रहरीले दाबी गरेको छ। यता सात दलको वीरगन्ज आमसभामा घाइते १५ को राजधानीमा उपचार भइरहेको छ। सैनिक हेलिकोप्टरबाट राजधानी ल्याइएका उनीहरूको त्रिवि शिक्षण अस्पताल र वीर अस्पतालमा उपचार भइरहेको छ।
वीरगन्जमा भएको बम विस्फोटमा ५४ घाइते भए पनि अन्य केहीको नारायणी उपक्षेत्रीय अस्पतालमा उपचार भइरहेको छ भने केही उपचारपछि घर र्फर्किसकेका छन्। राजधानीमा उपचार गराइरहेका घाइतेमध्ये अधिकांशका हातखुट्टा र टाउकोमा गम्भीर चोट लागेको अस्पताल स्रोतले बताएको छ।