स्वतन्त्र बिद्यार्थी युनियनको चुनाव स्थगित

सात दल उच्चस्तरीय संयन्त्रको बैठकले संविधानसभा चुनावलाई नकारात्मक असर पर्ने भन्दै फागुन १६ गते हुने भनिएको स्वतन्त्र बिद्यार्थी युनियनको चुनाव स्थगित गर्ने निर्णय गरेको छ ।

सात दल उच्चस्तरीय संयन्त्रको माघ २१ गते भएको बैठकले स्वतन्त्र बिद्यार्थी युनियनको चुनाव स्थगित गर्न 'सम्बन्धित निकाय' लाई सुझाव दिने निर्णय गरेको छ । युनियनको चुनाव फागुन १६ गतेका लागि तोकिएको थियो । सात दलमा एमाले चुनावको पक्षमा थियो, माओवादी बिपक्षमा थियो भने पछिल्लो पटक नेपाली कांग्रेस पनि चुनावको बिपक्षमा देखिएको थियो । संयन्त्रको बैठकपछि संचारकर्मीसँग कुरा गर्दै नेपाली कांग्रेस उपसभापति तथा मन्त्री रामचन्द्र पौडेलले संविधानसभा चुनावको संवेदनशिलतालाई ध्यानमा राखेर बिद्यार्थी युनियनको चुनाव स्थगित गर्न सुझाव दिने निर्णय गरिएको बताए ।
संयन्त्रको बैठकले स्थानीय निकाय तत्काल गठन नगर्ने पनि निर्णय गरेको छ । स्थानीय निकाय गठनको बिषयमा निर्णय गर्न संयन्त्रले माघ १ गते बनाएको कार्यदलले बिबादका कारण कुनै निर्णय गर्न नसकेपछि यो बिषय पुन संयन्त्रमै फर्किएको थियो । एमाले २०५४ को स्थानीय निकायलाई आधार बनाएर पुनर्गठन गर्नुपर्ने पक्षमा थियो भने नेपाली कांग्रेस र माओवादी यसको बिपक्षमा थिए ।
संयन्त्रको बैठकले तराईमा आन्दोलनरत समूह वार्तामा आए तथा वार्ता समिति पुनर्गठनको माग भए पुनर्गठन गर्ने निर्णय गरेको छ । अहिले शान्ति तथा पुनर्निर्माण मन्त्रीको संयोजकत्वमा मन्त्रीस्तरीय सरकारी वार्ता टोली छ र बिगतका वार्ताका सहमति कार्यन्वयन नभएको भन्दै मधेशी लगायत आन्दोलनरत समूहले वार्ता समितिसँग असन्तुष्टि ब्यक्त गरिरहेका छन् । यसैगरी, नवलपरासीको सुस्तामा भएको भारतीय अतिक्रमणबारे सिमाविदसँग परामर्श गर्ने, भारतसँग कुटनीतिक पहल गर्न सरकारलाई सुझाव दिने तथा सुस्ताबाट आन्दोलनका लागि राजधानी आएकालाई घर फर्काउन पनि सरकारलाई सुझाव दिने संयन्त्र बैठकले निर्णय गरेको माओवादी वरिष्ठ नेता मोहन बैद्यले बताए