उदितका छोरा आदित्य अब हिरो हुने

१९ फेब्रुअरी, ०८ । नेपाली तथा हिन्दी गायक उदितनारायण झाका छोरा आदित्यनारायण झा चांडै बलिउडमा नायक भएर देखापर्ने भएका छन् । आदित्यले यसअघि पनि "जब प्यार किसी से होता है" फिल्ममा नायक सलमान खानको छोराको भूमिका निभाएका थिए । जुन फिल्मबाट उनी फिल्मफेयर अवार्डमा उत्कृष्ट बालकलाकारका रुपमा छनोटमा परेका थिए । नेपाली चलचित्र मोहनीमा "यो गाउंको ठिटो म... " बोलको गीतमा पिता उदितसंगै गीत गायका आदित्यले त्यसपछि नेपाली गीत गायका छैनन् । जुन गीत लोकप्रिय मानिन्छ । त्यसपछि आदित्यले लगत्तै थुप्रै हिन्दी फिल्मका गीतहरुमा स्वर दिएका छन् । गीत गाउन छाडेर लण्डनमा संगीतमा डिप्लोमा सकेलगत्तै आदित्यले जी टेलिभिजनद्वारा सञ्चालित सारेगमप कार्यक्रमको उदघोषण गरेका थिए । सुरिलो स्वर र आकर्षक जीउडाल भएका कारण कार्यक्रम दौरानमा थुप्रै युवतीहरुले आदित्यसंग प्रेम प्रस्ताव पनि राखेका थिए । हङकङमा आयोजित एक कार्यक्रममा त एउटी युवती स्टेजमै पुगेर आदित्यको गालामा किस खाएकी थिइन् । अब आदित्य बलिउडमा हिरो बन्ने भएपछि पिता उदितको मनोकांक्षा पूरा हुने भएको छ । किनभने उदितले पहिलेदेखि नै आदित्य बलिउडमा नायक हुनेछ भन्ने गरेका थिए । हम दिल दे चुके सनम, देवदास, ब्ल्याक, सांवरिया फिल्म बनाएर बलिउडमा छुट्टै नाम कमाएका सञ्जयलीला भन्सालीले बनाउन लागेको नयां फिल्ममा आदित्यलाई नायकको भूमिकामा खेलिदिन प्रस्ताव राखेका छन् । विशेष गरी नयां कलाकार जन्माउने र तिनीहरुलाई चर्चामा ल्याउन भन्साली माहिर मानिन्छन् । उनले गतवर्ष बनाएको सांवरियामा ऋषि कपुरका छोरा रणवीर कपुर र अनिल कपुरकी छोरी सोनम कपुरलाई नायिका बनाएर खेलाएका थिए । फिल्म हिट नबने पनि रणवीर र सोनम रातारात हिट भए । उनीहरुसंग यतिखेर थुप्रै फिल्म हातमा छन् ।