चिप्लेटीले बालकको मृत्यु

काठमाडौं, फागुन १० - बूढानीलकण्ठस्थित एक विद्यालयमा अध्ययनरत एक बालकको खेलिरहेको अवस्थामा चिप्लेटी पल्टिएर मृत्यु भएको छ ।
मृतक बालक बूढानीलकण्ठस्थित पञ्चकन्या निम्न माध्यमिक विद्यालयमा कक्षा ३ का १३ वर्षीय सुशील थिङ हुन् ।
'चिप्लेटी जमिनमा गाडिएको भए पनि धेरै छात्रछात्रा एकै पटक खेल्दा उखेलिएर पल्टिएको हो,' सहायक प्रधानाध्यापक दिलीप थापाले भने । बिहान साढे नौ बजे कक्षा सुरु हुनुभन्दा अघि घटना भएको हो । प्रहरी निरीक्षँक गोविन्द अधिकारीका अनुसार स्कुल व्यवस्थापन र पीडित परिवारबीच सहमति भएपछि शव परीक्षणका लागि शिक्षण अस्पताल पठाइएको छ ।
बालकको काज किरियाका लागि स्कुलले नगद ७० हजार दिने भएको थापाले बताए । उक्त रकम स्कुलले मात्र दिन नसक्ने भएकाले स्कुलबाट २० हजार, छिमेकी, त्यही क्षेत्रको बोर्डिङ स्कुलहरूबाट रकम जम्मा गरेर करिब १० दिनभित्र मृतकका परिवारलाई दिइने भएको छ ।