राजधानीमा संविधानसभाको रौनकता बढ्यो

२६ फेब्रुअरी, ०८ । यो बर्षको लामो चिसो हिउँदको अन्त र फागुण महिनाको तातोपनसंगै संविधानसभाको चुनावी चहलपहलले राजधानीको सरगर्मी ह्वाट्टै बढेर गएको छ । समानुपातिक प्रणालीअन्तर्गत फागुन ८ र १२ मा उम्मेदवारको बन्द सूची पेस हुनुका साथै प्रत्यक्षतर्फ २४० क्षेत्रमै उम्मेदवारी दर्ता भएबाट सो चहलपहल शुरु भएको हो ।दुइ पटक चुनाव सरेपछि जनतामा चुनाव हुन्छ कि हुँदैन भन्ने अविश्वास पैदा भइरहेका बेला केही जिल्लामा तनाबका बीच उम्मेदवारको मनोनयन दर्ता कार्य सम्पन्न भएको छ । मधेसमा आन्दोलनरत संयुक्त मधेसी मोर्चाले सुनसरी, सप्तरी, सिरहा, नवलपरासीलगायतका केही जिल्लाका अवरोध खडा गर्ने प्रयास भए पनि सबै जिल्लामा उम्मेदवारी दर्ता भएको छ ।काठमाडौंका १० वटा निर्वाचन क्षेत्रमा सबैभन्दा बढी २२१ जनाले उम्मेदवारी दर्ता गराएका छन् भने मनाङ जिल्लाको एउटा निर्वाचन क्षेत्रमा सबैभन्दा कम तीनजनाले उम्मेदवारी दर्ता गराएका छन् । काठमाडौंको क्षेत्र नं. ७ मा सबैभन्दा बढी ३७ जनाले उम्मेदवारी दिएका छन् । २ सय ४० निर्वाचन क्षेत्रमा गरी जम्मा दुइ हजार २ सय ११ जनाले उम्मेदवारी दर्ता गराएको जानकारी निर्वाचन आयोगले दिएको छ ।संविधानसभाको चुनाव विथोल्ने अभियानमा लागेको संयुक्त मधेसी मोर्चा, सूर्यबहादुर थापा अध्यक्ष रहेको राष्ट्रिय जनशक्ति पार्टी उम्मेदवारी दर्ता गराएका छैनन् । काठमाडौंमा उम्मेदवारी दर्ता गराउन आएका विभिन्न राजनीतिक दलहरूले बाजागाजा, विभिन्न झाँकीसहित उम्मेदवारी दर्ता गराएका थिए । काठमाडौंका क्षेत्र नं. १० मा माओवादी अध्यक्ष प्रचण्ड, एमालेका स्थानीय नेता सानु श्रेष्ठ, नेपाली कांग्रेसका युवा नेता राजन केसी, राष्ट्रिय प्रजातन्त्र पार्टी मदन थापाबीच चर्को प्रतिस्पर्धा हुने देखिएको छ । यसैगरी क्षेत्र नं ५ मा कांग्रेसका चर्चित गणतन्त्रवादी नेता नरहरि आचार्य, एमालेका इश्वर पोखरेल र माओबादीका बिपेन्द्र महर्जनबीच पनि तिब्र प्रतिस्पर्धा हुने भएको छ । ।काठमाडौं उपत्यका नेकपा (एमाले) क्षेत्र नं. १ बाट शिक्षा तथा खेलकुद मन्त्री प्रदीप नेपाल र नेपाली कांग्रेसका उपसभापति प्रकाशमान सिंह, राप्रपाका तारानाथ लुइँटेल, माओवादीका राममान श्रेष्ठबीच चर्को प्रतिस्पर्धा हुने भएको छ । प्रकाशमान सिंह काठमाडौंका रैथाने हुन् भने प्रदीप नेपाल बाहिरबाट आएर उम्मेदवारी दर्ता गराएका हुन् ।त्यसो त एमालेले उम्मेदवार बनाएका काठमाडौंका प्रदीप नेपाल, माधव नेपाल, विद्या भण्डारी र इश्वर पोख्रेल, योगेश भट्टराई बाहिरी जिल्लाका हुन् । कांग्रेसका सबै नेताहरू काठमाडौंकै स्थायी बसोबास भएका नेताहरू चुनावी मैदानमा छन् राजधानीको काठमाडौं जिल्लाका १० क्षेत्रमा तिब्र प्रतिस्पर्धा हुने देखिएका प्रमुख राजनैतिक दलका उम्मेदवारहरु : क्षेत्र नं. १ मा प्रकाशमान सिंह (नेपाली काँग्रेस), प्रदीप नेपाल (एमाले), राममान श्रेष्ठ (माओबादी) क्षेत्र नं. २ मा दीपप्रकाश कुइँकेल (नेपाली काँग्रेस), माधव नेपाल (एमाले), झक्कु सुबेदी (माओबादी) क्षेत्र नं ३ मा चक्रबहादुर ठकुरी (नेपाली काँग्रेस), रामेश्वर फुँयाल (एमाले), मनु हुँमागाई (माओबादी) क्षेत्र नं. ४ मा सुप्रभा घिमिरे (नेपाली काँग्रेस), बिद्या भण्डारी (एमाले), पवनमान श्रेष्ठ (माओबादी) क्षेत्र नं. ५ मा नरहरि आचार्य (नेपाली काँग्रेस), इश्वर पोखरेल (एमाले), बिपेन्द्र महर्जन (माओबादी) क्षेत्र नं ६ मा भीमसेनदास प्रधान (नेपाली काँग्रेस), योगेश भट्टराई (एमाले), हितमान शाक्य (माओबादी) क्षेत्र नं ७ मा प्रमिला सिंह (नेपाली काँग्रेस), राजेन्द्र श्रेष्ठ (एमाले), हिसिला यमी (माओबादी) क्षेत्र नं ८ मा नविन्द्रराज जोशी (नेपाली काँग्रेस), अष्टलक्ष्मी शाक्य (एमाले), सबोत्तम डंगोल (माओबादी) क्षेञ नं. ९ मा ध्यानगोविन्द रञ्जित (नेपाली काँग्रेस), कृष्णगोपाल श्रेष्ठ (एमाले), माईला लामा (माओबादी) क्षेत्र नं १०. राजेन्द्रकुमार केसी (नेपाली काँग्रेस), सानु श्रेष्ठ (एमाले), पुष्पकमल दाहाल प्रचण्ड (माओबादी)