१५ सय कांग्रेस नेता कार्यकर्ताले पार्टी परित्याग

नेपाली कांग्रेस केन्द्रीय कार्यालयले संविधानसभा निर्वाचनको टिकट वितरणमा अनियमितता गरेको भन्दै मुगु कांग्रेसको जिल्ला कार्यालयमा शनिबार साँझ कांग्रेस कार्यकर्ताहरुले नै आजगनी गरेका छन् ।
जिल्ला सभापति हस्तबहादुर मल्ललाई टिकट नदिई राजावादी खगबहादुर शाहीलाई दिएको भन्दै असुन्तुष्ट कार्यकर्ताहरुले सदरमुकाममा रहेको पार्टी कार्यालयमा आगजनी गरेका हुन् । आगजनीपछि झण्डै एक सय बढी कार्यकर्ताले पार्टीका शिर्षस्थ नेताका विरुद्ध नाराबाजीसमेत गरेका थिए । आजगनीबाट फर्निचर, कागजपत्र, पार्टीका झण्डलगायतका सामाग्री जलेर नष्ट भएको छ।
त्यस्तै मधेश आन्दोलनप्रति गम्भीर नभएको र निर्वाचनमा उम्मेदवार छनोट गर्दा चाकडी र चुक्ली लगाउनेले मात्र टिकट पाएको आरोप लगाउँदै भोजपुर र सप्तरीका झण्डै १५ सय कांग्रेस नेता कार्यकर्ताले पार्टी परित्याग गरेका छन् । अन्तरिम सरकारको नेतृत्व गरिरहेको नेपाली कांग्रेससमेत मधेश समस्या समाधान गर्न गम्भीर नभएको भन्दै सप्तरी क्षेत्र नम्बर १ का झण्डै १५ सय नेता तथा कार्यकर्ताले शनिबार पार्टी त्यागेको घोषणा गरेका छन् । कांग्रेस महासमिति हेमराज ताटडको अगुवाईमा कञ्चनपुरको सर्वोदय उच्च माविमा भएको भेलाले पार्टी परित्याग गरी मधेश आन्दोलनमा लाग्ने निर्णय गरेको हो ।
समस्या समाधानविना मधेशमा निर्वाचन सम्भव नभएको र कांग्रेसले मधेश समस्या समाधान गर्न गम्भीर पहल नगरी आलटाल मात्र गर्न खोजेको आरोप लगाउँदै भेलाले पार्टी परित्याग गरिएको तातटले बताउनुभयो । भेलामा सो क्षेत्रका चर्चित कांग्रेसी नेताहरु हजारी साह, भिखारी गुप्तालगायतका नेता कार्यकर्ताले पार्टी परित्याग गरेका थिए ।
त्यस्तै भोजपुरका चार जना महासमिति सदस्य, पाँच जना महाधिवेशन प्रतिनिधि र दुई जना बरिष्ठ नेताले पनि शनिबार कांग्रेस परित्याग गरेको घोषणा गरेका छन् । संयुक्त विज्ञप्ति जारी गरी पार्टी त्याग गर्नेमा भोजपुरका महासमिति सदस्यहरु नारायणबहादुर कार्की, चित्रबहादुर कार्की, बालकृष्ण थापा, इर्खबहादुर राई तथा महाधिवेशन प्रतिनिधिहरु कुलदिप राई, माया राई, रविन राई, शालिकराम खत्री, गोविन्द कार्कीलगायत रहेका छन् ।