अमेरिकामा एक नेपालीको मृत्यु

५ फेब्रुअरी, ०८ । भर्जिनियाको भियनामा आफ्नी श्रीमतीका साथ बस्दै आएका झापा शनिश्चरेका ३३ बर्षीय प्रदीप थापाको आइतवार निधन भएको छ । क्यानसर रोगवाट पिडित थापा आइतबार दिउँसो भर्जिनियास्थित फेयरवक्स अस्पतालमा मृत्यु भएको छ । उनी डेढ वर्षअघिमात्र डीभी लोटरी मार्फत अमेरिका आइपुगेका हुन् ।शनिबार साँझ अस्पताल भर्ना गरिएका थापाको चारदिन अघिमात्र किमोथेरापी गरिएको थियो ।आफ्ना श्रीमानको मृत्युको खबर पाएपछि श्रीमतीसमेत मुर्छा परी सोही अस्पतालमै उपचार्थ भर्ना गर्नुपरेको र राती आठ बजेतिर मात्र उनको होस खुलेको अमेरिका नेपाल सोसाइटीका अध्यक्ष प्रेम संग्रौलाले वताउनुभयो । थापाका बुवाआमा एक भाइ र दुइ बहिनीहरु झापा शनिश्चरेमै रहँदै आएका छन् । थापाको दुइ वर्षअघिमात्र विवाह भएको र विवाहपश्चात्मात्र आफूलाई क्यान्सर रोग लागेको थाहा भएको थियो ।थापाका वावुआमाले छोराको दाहसंस्कार अमेरिकामै गरिदिन आग्रह गरेका कारण अब नेपाली समाजको सहयोगमा दाहासंस्कार गर्न लागिएको थापाका आफन्तले जानकारी दिएका छन् ।