प्रहरी गृहमन्त्रीको नियन्त्रणमा छैनः गजुरेल

फेब्रुअरी, ०८ । नेकपा माओवादीका वरिष्ठ नेता सीपी गजुरेलले प्रहरी प्रशासन गृहमन्त्री कृष्णप्रसाद सिटौलाको नियन्त्रणमा नरहेको बताउनुभएको छ । उहाँले वाईसिएलको कार्यालयमा प्रहरीले छापामारेको बारे प्रश्न गर्दा गृहमन्त्री स्वयंले प्रहरी आफ्नो नियन्त्रणमा नरहेको बताउनुभएको खुलासा गर्नुभएको छ । 'प्रहरी मैंले भनेको मान्न छाडिसक्यो', गृहमन्त्रीको भनाई उदृत गर्दै गजुरेलले भन्नुभयो,'चुनाव भाड्ने उद्देश्यले प्रतिगामीहरुले प्रहरीलाई गलत ढंगबाट प्रयोग गर्न खोजियो ।' प्रहरीलाई कस्ले आदेश दियो भन्ने प्रश्नमा उहांले त्यसको खोजी भईरहेको र छिट्टै जानकारी दिने बताउनुभयो ।चुनाव भाड्न दरबार, अमेरिका र भारतका अतिवादी सक्रिय रहेको आरोप लगाउदै पछिल्लो घटनालाई त्यसैको नमूना भन्नुभयो । नेपाली कांग्रेसभित्र राजा ब्यूताउनुपर्छ भन्नेहरु माओवादी र कांग्रेसका संविधानसभाका पक्षधरबीच भिडन्त गराउने षड्यन्त्रमा लागेको उहांको आरोप थियो ।गजुरेलले संयुक्त क्रान्तिकारी जनपरिषद समानान्तर सरकार नभएको दाबी गर्नुभयो । द्वन्द्वकालमा जसरी जनपरिषद क्रियाशील नहुने बताउदै भन्नुभयो,'चुनावलाई सफल बनाउन जनपरिषद परिचालन हुन्छ ।' जनपरिषदका विषयमा भ्रम फैलाइएको बताउदै यसको सक्रियतालाई शान्ति सम्झौता विपरितको कार्य नभएको जिकिर गर्नुभयो । जनपरिषदले चुनाव भाड्छ भन्नुलाई गलत प्रचार भन्नुभयो । नेपाली कांग्रेसका प्रवक्ता अर्जुननरसिंह केसीले नेकपा माओवादीले संयुक्त क्रान्तिकारी जनपरिषद सक्रिय बनाएर वृहत शान्ति सम्झौता उल्लंघन गरेको बताउनुभएको छ । 'माओवादीले जनपरिषद ब्यूंताएर शान्ति सम्झौताको उल्लंघन गरेका छन्',केसीले भन्नुभयो,'उसको संविधानसभाप्रतिको प्रतिवद्धतामा थप आशंका पैदा भयो ।' शान्ति सम्झौताको पालना नभए चुनावमाथि खतरा आउने भन्दै माओवादीलाई गतिविधि सुधार्न आग्रह गर्नुभयो । माओवादीको भनाई र गराईमा व्यापक भिन्नता देखिएको भन्दै चुनावको मुखमा जनपरिषद ब्यूंताउनु गलत नियतबाट प्रेरित रहेको बताउनुभयो । नेकपा एमालेका केन्द्रीय सदस्य प्रदीप ज्ञवालीले संविधानसभा निर्वाचनको मिति नजिकिदै गर्दा सात दलभित्रैबाट समस्या बढेको बताउनुभयो । माओवादीले जनपरिषद क्रियाशील बनाएर शान्तिसम्झौताको ठाडो उल्लंघन गरेको बताउनुभयो । उहांले प्रश्न गर्नुभयो, 'चुनावको मुखमा आएर जनपरिषद ब्यूताएर के गर्न खोजेको हो ?' माओवादीले सत्ता कब्जा गर्ने नियतले आफूलाई प्रस्तुत गर्दै लगेको बताउनुभयो । राष्ट्रिय जनमोर्चाका अध्यक्ष चित्रबहादुर केसीले जनताले सात दलले चुनाव गर्नेमा विश्वस्त नभएको बताउनुभयो । माओवादी भिन्न विचारकालाई आक्रमण गर्न सक्रिय भएको, नेपाली कांग्रेसभित्र राजावादी हावी हुदै गएकाले चुनावमाथि खतरा बढेको उहांको भनाई थियो । दलहरुले सत्ताको तुजुक नफाले चैतमा चुनाव हुननसक्ने बताउनुभयो ।