आज महाशिवरात्री

६ मार्च, ०८ । शिवको उत्पत्ति भएको रातको नामबाट शिवरात्री पर्व सुरु भएको धार्मिक विश्वासअनुसार हिन्दु धर्मालम्वीहरुले आज भगवान शिवको पूजा आराधना गरी मुलुकभरी महाशिवरात्री पर्व मनाईदै छ । एकाविहानै नदी, कुण्ड र तलाउमा स्नान गरी धर्मालम्वीहरुले शिवालयहरुमा श्रद्धाभक्तिपूर्वक पूजा-आराधना गर्दछन् । यस पर्वका दिन उपवास वसि रातभर जाग्राम वसे सर्वसिद्ध लाभभई यमलोक जानु नपर्ने विश्वास रहेको छ । विश्वभरिकै हिन्दूहरुको सबैभन्दा ठूलो धार्मिकस्थल पशुपतिमा धार्मिक मेला भर्न देश विदेशका लाखौं भक्तजनहरु ओइरिने गर्दछन् । शिवको उत्पत्ति भएको रातको नामबाट शिवरात्री पर्व सुरु भएको धार्मिक विश्वास छ । कालरात्री, महारात्री, सुखरात्री आदिका नामले पनि पुकारिने यस पर्व फागुन कृष्ण चतुदशीका दिन शिवआराधना, भजनकिर्तन, उपवास, धुनीजलन गरी मनाइन्छ । शिवरात्रीको प्रसंगमा एउटा कथन छ- परापूर्वकालमा एक व्याधा शिकार खेल्न वनमा गयो । त्यस दिन उसले शिकार भेटेन र दिन त्यसै बित्यो । रात परिसक्दा ऊ घना जंगलको बीचतिर पुगिसकेकाले हत्तपत्त बासस्थान र्फकने आंट गर्न सकेन र रात बिताउन बेलको रुखमा चढ्यो । निदाए रुखबाट खसिएला भन्ने पीर थियो । त्यसैले निद्रा भगाउन रातभर बेलका पात चुड्दै बस्यो । संयोगशव उसले टिप्दै फ्यांकेको बेलका पातहरु (बेलपत्र) शिवको मूर्तिमा खस्यो । अन्जानमै व्याधाले बेलपत्र चढाएपछि उसको मनमा शिवका जीवनभरका पाप सबै नष्ट भए र तत्पश्चात ऊ पुण्यकर्ममा लाग्यो । यो रात फागुन कृष्ण चतुदशी परेकाले हरेक वर्ष त्यही रात शिवरात्रीका रुपमा मनाइएको किवंदन्ती छ । पछिल्ला दिनमा शिवरात्रीमा विकृतिहरु बढ्न थालेका छन् । विभिन्न नसालु पदार्थले लठ्ठएर बसेका युवाहरुमा गांजा संस्कृति भित्र्याउन बाबाहरुले सहयोग पुर्‍याइरहेका छन् । अघिपछि त चोक र बजारहरुमा गाजा र अरु नशालु पदार्थ खाएर लठ्ठै हुने युवाहरु शिवरात्रीमा त झन् विशेष योजना बनाउंछन् । शिवरात्रीमा शिवको पूजा हुने भएकोले प्रसादको रुपमा गांजा, भाङ, धतुरो खाने प्रचलन छ । शिवरात्रीको आफ्नै महिमा छ । पशुपतिनाथबाहेक देशभरिका शिवमन्दिरहरुमा मेला लाग्छ शिवरात्रीमा । कतिपयले त घरघरै आफ्नै आंगन वा टोल, चोकमा धुनी बालेर शिवलाई हर्षित पार्ने प्रयास गर्छन् । शिवरात्रीको यति ठूलो महिमा हुंदाहुंदै पनि यस पर्वमा भित्रिने खराब गांजा संस्कृतिप्रति सचेत समाजको ध्यान जानु जरुरी भएको संस्कृतिविद् बताउंछन् ।