प्रचण्डको हातमा नारीचुली

काठमाडौं। नेपाल कम्युनिष्ट पार्टी माओवादीका अध्यक्ष प्रचण्डका हातमा अहिले नारीचुली नामक एउटा बृहत् ग्रन्थ रहेको छ। हालको व्यस्त समयमा पनि उहाँले प्रतिनिधि नारीस्रष्टाका विषयमा लेखिएको नारीचुली पढ्नमा समय दिइरहनुभएको छ। नरेन्द्रराज प्रसाईंद्वारा लिखित नारीचुली नेपाली साहित्याकाशमा चर्चित भइरहेका सन्दर्भमा अध्यक्ष प्रचण्डको नारीचुलीप्रतिको सकारात्मक धारणाले सो ग्रन्थले झनै पाठक सङ्ग्रह गर्न थालेको बुझिएको छ। गोरखापत्र संस्थानबाट प्रकाशित हुने मधुपर्कको फागुन अङ्कमा पनि प्रचण्डले भन्नुभएको छ- आजभोलिकै कुरा गर्दा त पढ्ने फुर्सद निकाल्न पनि कठिन भएको छ। फेरि पनि नयाँ स्वाद मान्दै नरेन्द्रराज प्रसाईंको चारीचुली समय मिलाएर पढ्दैछु।' अध्यक्ष प्रचण्डको सो अभिव्यक्तिले नेपाली साहित्यमा देखापरेको सङ्कीर्ण समूहगत राजनीतिको पर्दा च्यात्न मद्दत पुगेको देखिन्छ। साहित्य सधैँ स्वच्छ हुनुपर्छ भन्ने व्यहोरालाई अध्यक्ष प्रचण्डको भनाइले अझ प्रष्ट्याएको छ। साहित्यमा राजनीतिको हिलो नमुछ्न पनि अध्यक्ष प्रचण्डको नारीचुलीप्रतिको मोहले शिक्षित जनसमुदायलाई सन्देश दिएको छ। नइ प्रकाशनद्वारा प्रकाशित नारीचुलीमा आजको नेपालका सम्पूर्ण दलहरूमा आस्था राख्नेसमेत प्रतिनिधि नारीस्रष्टाको जीवनी लेखिएको छ। तथापि त्यस ग्रन्थलाई गैरराजनीतिक मानिएको छ। सो ग्रन्थमा आदिकवयित्री ललितत्रिपुरासुन्दरीदेखि गणतान्त्रिक स्रष्टा शारदा शर्मासम्म बाउन्न जना प्रतिनिधि नारीसाहित्यकारको नालीबेली लेखिएको छ भने २०१७ सालअघि जन्मेका २२४ जना नारीस्रष्टाहरूको छोटो-छोटो परिचय दिइएको छ। कट्टर राजावादीका रूपमा परिचित नरेन्द्रराज प्रसाईंले लेखेको नारीचुली गणतन्त्रवादी नेता जगदीसमशेर राणाले अङ्ग्रेजी भाषामा अनुवाद गरिसक्नुभएको छ। सो ग्रन्थ चाँडै प्रकाशनमा आउन लागेको राणा सूत्रबाट थाहा भएको छ। राणा केही समयअघि काठमाडौंबाट भारतको सिमला र्फकनुभएको छ। रानी ललितत्रिपुरासुन्दरीद्वारा लिखित राजधर्मको लोकार्पण गर्न राणा नइ प्रकाशनको निम्तोमा सिमलाबाट राजधानी काठमाडौं आउनुभएको थियो।