'रोल्पामै हराउने षड्यन्त्र भइरहेको छ'

माओवादी अध्यक्ष प्रचण्डले आफूलाई रोल्पामै चुनाव हराउने षड्यन्त्र भइरहेको खुलाशा गरेका छन् । 
संविधानसभा निर्वाचन प्रचारमा रोल्पा पुगेका माओवादी अध्यक्ष प्रचण्डले रोल्पाबाटै आफूलाई हराउन बिदेशी शक्ति, दरवार, एमाले र नेपाली कांग्रेस लागेको बताएका छन् । प्रचण्ड काठमाडौ र रोल्पाबाट उमेदवार छन् । चैत ३ गते रोल्पामा पत्रकारहरुसँग कुरा गर्दै उनले माओवादीले संविधानसभा चुनावमा बहुमत ल्याए मात्र क्रान्ति सम्पन्न हुने उल्लेख गरे । छिटै दरवारसँग अन्तिम मुठभेड हुने पनि उनको भनाइ थियो । दरवारसँगको मुठभेड संविधानसभा चुनाव अघि वा पछि हुनेबारे भने प्रचण्डले स्पष्ट पारेनन् ।
२०६३ साल बैशाख ११ गते राजा, नेपाली कांग्रेस र एमालेबीच राजा राख्ने सम्झौता भएको तथा त्यही सम्झौता पालना गर्न नेपाली कांग्रेस र एमालेले घोषणापत्रमा प्रधानमन्त्रीय पद्धतिको वकालत गरेको पनि पत्रकारहरुसँग प्रचण्डले दावी गरे । 'ज्ञानेन्द्रले केही दिनमै त्यो सम्झौताको खुलाशा गर्न सक्छन्, त्यसपछि क्रान्ति हुन्छ र दलहरु नाङ्गिन्छन्' प्रचण्डको भनाइ थियो ।
संविधानसभा चुनाव असफल पार्न ठूला नेताको हत्या हुनसक्ने दावी प्रचण्डले रोल्पामा पनि दोहोर्याए । प्रधानमन्त्रीसँग आफूले यो कुरा गरेको तथा प्रधानमन्त्रीले सुरक्षित भएर हिडन सल्लाहा दिएको पनि प्रचण्डले त्यहाँ उल्लेख गरे । फागुन ३० गते राजधानीबाट रोल्पा हिडेका प्रचण्ड चैत १ गतेदेखि रोल्पामा छन् । चैत ५ गतेसम्म रोल्पाका चुनावी सभा तथा कार्यकर्ता भेलालाई सम्बोधन गर्ने उनको कार्यक्रम छ ।