मुस्ताङमा गाडी पुग्यो

७ मार्च, ०८ । हिमालपारिको जिल्ला मुस्ताङमा पहिलोपटक बिहिवार सवारी साधन पुगेको छ ।बिहिवार बेनीबाट छुटेको सवारी साधन मुस्ताङको सदरमुकाम जोमसोममा पुगेका नेपाली सेनाले जनाएको छ ।सैनिक दिवसको अवसर पारेर बेनीदेखि नौवटा सवारी साधनलाई सेनाले जोमसोम पुर्‍याएको बज्रदल गण म्याग्दीले जनाएको छ । म्याग्दीको सदरमुकाम बेनीदेखि मुस्ताङको सदरमुकाम जोमसोमसम्मको ७६ किलोमिटर सडकमध्ये मङ्गलबार बाँदरजुङ्गे भीरको सय मिटर ट्रयाक खुलेपछि गाडी पुर्‍याइएको सेनानी धर्मेन्द्र झाले बताउनुभयो । करिब १० वर्षअघि निर्माण कार्य सुरु भएको उक्त सडक निर्माणको जिम्मा २०५६ सालदेखि नेपाली सेनाले लिएको थियो । सडकको उदघाटन महासेनानी अशोक बिष्टले गर्नुभएको थियो । मुस्ताङ राजमार्गसंग जोडिएपछि मुस्ताङका स्याउले बजार फाउनुका साथै कठिन हिमाली जनजीवनमा समेत सुविधा पुग्ने बताईएको छ ।