माओवादीद्वारा घोषणा-पत्र सार्वजनिक

८ मार्च, ०८ । नेकपा माओवादीले संविधानसभाको ३९ पृष्ठ लामो चुनावी घोषणपत्र सार्वजनिक गरेको छ ।माओबादीले 'नयाँ नेपालका लागि नयाँ विचार र नयाँ नयाँ नेतृत्व' भन्ने नाराका साथ घोषणपत्र सार्वजनिक गरेको हो । राजधानीको पाँचतारे होटलमा एक पत्रकार सम्मेलनको आयोजना गरी ३९ पृष्ठ लामो प्रतिवद्धता पत्र सार्वजनिक गरिएको हो । स्वाधीन र जनमुखी संघीय लोकतान्त्रीक गणतन्त्रको स्थापनाको लक्ष्य माओवादी घोषणापत्रले लिएको छ । मुलुकको सार्वभौमसत्ता जनतामा र कार्यकारी अधिकार राष्ट्रपतिमा निहित रहने तथा राष्ट्रपति प्रतक्ष्य निर्वाचनवाट र प्रधानमन्त्रीको चयन संसदवाट हुने प्रस्ताव गरिएको छ ।घोषणापत्रमा राजतन्त्रको पूर्ण उन्मुलन गरी गणतन्त्रको स्थापना, राष्ट्रपतीय प्रणाली, सवैखाले स्वतन्त्रता र मौलीक अधिकारको ग्यारेन्टी लगायतका विषयलाइ समावेश गरिएको छ । घोषणापत्रमा मुलुक धर्म निरपेक्ष रहने, केन्द्रमा दुई सदन र हरेक राज्यमा एक सदन रहने प्रस्ताव गरिएको छ । तल्लो सदनमा जनसंख्याको आधारमा प्रतिनिधित्व गराईने र माथिल्लो सदनमा सवै राज्यका प्रतिनिधिहरु रहने प्रस्ताव गरिएको छ ।११ राज्य र दुई उपराज्य सहितको संघीय राज्य ब्यवस्था कायम हुने, जाली प्रमाण र गलत कागजातका आधारमा लिईएका नागरिकता खारेज गरिने र मुलुकका सवै नागरिकलाई एकै खाले नागरिकता दिईने, केन्द्र र राज्य सरकार गरी दुईखाले न्याय प्रणाली रहने, केन्द्रीय अदालत असाधारण अधिकारयुक्त रहने लगायतका विषय उल्लेख गरिएको छ ।